पर्वत– दिदीबहिनी कप राष्ट्रिय महिला भलिबलको तेस्रो संस्करण माघ २८ देखि फागुन १ गतेसम्म सञ्चालन हुने भएको छ । पर्वतको रेडियो दिदीबहिनीको आयोजनामा प्रतियोगिता सञ्चालन हुन लागेको हो । 
रेडियो दिदीबहिनीले गण्डकी प्रदेशस्तरीय एघारौं बृहत् महिला महोत्सव तथा रेडियोको नवौं वार्षिक उत्सव माघ २५ देखि फागुन ५ गतेसम्म मनाउँदै छ । त्यस अन्तर्गत राष्ट्रिय महिला भलिबल प्रतियोगिता तीन दिन सञ्चालन हुन लागेको हो । 

प्रतियोगितामा अघिल्लो संस्करण खेलेका ६ टोलीको सहभागिता निश्चित भइसकेको छ । तीन विभागीय टोलीहरू एपीएफ, नेपाल पुलिस र त्रिभुवन आर्मी क्लब तथा न्यु डायमन्ड एकेडेमी, पश्चिमाञ्चल भलिबल टोली र आयोजक टोलीले प्रतियोगिता खेल्ने रेडियो बुधबार आयोजित पत्रकार सम्मेलनमा दिदीबहिनीकी अध्यक्ष पूर्व सांसद कल्पना चापागाईंले जानकारी दिइन् । 

सहभागी टोलीलाई लिग कम नकआउटका आधारमा प्रतिस्पर्धा गराइनेछ । पर्वत सदरमुकाम कुश्मास्थित खुलामञ्चमा प्रतियोगिता सञ्चालान हुनेछ । प्रतियोगिताका लागि प्राविधिक सहयोग नेपाल भलिबल संघको रहनेछ । अघिल्लो संस्करणमा भन्दा यस वर्ष पुरस्कार राशि दोब्बर बढाइएको छ । यस संस्करणको विजेताले २ लाख रुपैयाँ पाउनेछन् भने उपविजेताले १ लाख र तेस्रो हुनेले ५० हजार रुपैयाँ पुरस्कार पाउनेछन् ।