सुर्खेत – कर्णाली प्रदेशका मुख्यमन्त्री महेन्द्रबहादुर शाहीले काठमाडौंमा राँगाको मःम खाने व्यक्ति धनी र मार्सीको भात खाने कर्णालीवासी गरीब बनाइएको दाबी गरेका छन् ।

वीरेन्द्रनगरमा बुधबार सामुदायिक रेडियो प्रसारक संघको राष्ट्रिय सम्मेलनलाई सम्बोधन गर्दै उनले पूँजीवादी संस्कारले कर्णाली गरीब भएको दाबी गरे ।

‘काठमाडौंमा राँगाको मःम खाने व्यक्ति धनी हुने, मार्सी धान खाने कसरी गरीब भए ?’ उनले भने, ‘विगत हेर्दा कर्णाली कपडामा आत्मनिर्भर थियो । खाद्यान्न तथा पशुपालनमा आत्मनिर्भर थियो ।’

उनले चाउचाउ खान नसकेका, बिस्कुट खान नसकेका र आधुनिक कपडा लगाउन नसकेका कारण कर्णालीलाई गरीब भनेर चित्रित गरिएको दाबी गरे ।

कर्णाली प्रदेश सरकार एक्लैले पछि परेका सूचकांकको ग्राफ बढाउन नसकेको बताए । कर्णाली प्रदेशका सूचकांक सबैभन्दा पछि छन् । मुख्यमन्त्री शाहीले भने, ‘सबै सरकार, दातृ निकायले कर्णाली प्रदेशलाई विशेष ध्यान दिनुपर्ने र आवश्यक सहयोग गरिदिनुपर्ने आवश्यकता हो । कर्णाली प्रदेश एक्लै अघि बढेर सूचकांकको ग्राफ बढाउन सक्दैन ।’

मुख्यमन्त्री शाहीले कर्णाली प्रदेश सरकारको मुख्य काम सम्भावनाको अध्ययन गर्ने भएको बताए । ‘अहिले अथाह सम्पत्ति, स्रोतसाधन छ भनेर भाषणमा भनेर मात्रै भनेका छौं । हामी कहाँ के कति छ भनेर तथ्यांक संकलन गर्ने छौं । यो वर्ष अध्ययन, अनुसन्धान, कानून निर्माणको वर्ष, योजनाको वर्ष हो,’ उनले भने, जेठसम्म कर्णालीको गन्तव्य कहाँ हो, कार्यान्वयन शैली कस्तो हुने परम्परागत शैली वा नयाँ शैली अपनाउनु पर्ने हो सार्वजनिक गर्नेछौं ।’

मुख्यमन्त्री शाहीले नेपालको प्रतिपक्ष भनेको गरीबी रहेको बताए । ‘हाम्रो प्रतिपक्षी विकास हो, सुशासन हो,’ उनले भने, ‘यसका लागि सबैले साथमा जान जरुरी छ । सबै राष्ट्र निर्माणको अभियानमा लागौं । जे अध्ययन गरेको हो, त्यही काम गर्नुपर्छ ।’

पढ्दा–पढ्दै उत्पादनमा लाग्नुपर्ने मुख्यमन्त्री शाहीले बताए । कविता, लाइब्रेरी, फेसबुक चलाएर देश नबन्ने उनले बताए ।