बुटवल- प्रदेश नम्बर ५ मा आज प्रदेश स्थापना दिवस मनाइँदै छ । प्रदेश सरकारले स्थापना दिवसको अवसरमा शुक्रवार प्रदेशभर सार्वजनिक बिदा दिएको छ । फागुन ३ गते प्रदेश सरकार गठन भएको दिनलाई आधार मानेर प्रदेश स्थापना दिवस मनाउने निणर्य प्रदेश सरकारले गरेअनुसार 'प्रदेश स्थापना दिवस' मनाइँदै छ । 

सो अवसरमा आज बिहान बुटवलमा प्रभातफेरीसमेत निकालिएको छ । बुटवल बहुमुखी क्याम्पसबाट शुरू भएको प्रभातफेरी बुटवलमण्डपमा विशेष समारोहमा परिणत भएको छ । प्रभातफेरीमा प्रदेशका मन्त्रीहरू कुलप्रसाद केसी, बैजनाथ चौधरीसहित प्रदेशसभा सदस्यहरू, बुटवलसहित विभिन्न नगरपालिकाका प्रमुख तथा जनप्रतिनिधहरू, कर्मचारी, संघ  संस्थाका प्रतिनिधिलगायतको सहभागिता रहेको थियो ।

प्रदेश सरकारले ३ दिनसम्म प्रदेश स्थापना दिवस मनाउने निणर्य गरेपछि हिजोदेखि यस प्रदेशमा रक्तदान, सरसफाई, विद्यालयहरूमा वक्तृत्वकला तथा हाजिरीजवाफ प्रतियोगिताहरू भएका छन । यसै अवसरमा हिजो प्रदेश ५ को नवलपरासीदेखि बर्दियासम्मको मुख्य राजमार्ग सरसफाई गरिएको छ । प्रदेशका मुख्यमन्त्री शंकर पोखरेलसहित ६ जना मन्त्री विभिन्न जिल्लामा सरसफाईमा सहभागी भएका थिए ।