धनगढी –जिल्ला अदालत कैलालीले टीकापुरमा भएको हिंसात्मक घटनाका दोषिलाई जन्मकैदको फैसला सुनाएको छ । न्यायाधीश पर्शुराम भट्टराईको एकल इजलासले सांसद् रेशम चौधरीसहित ११ जनालाई जन्मकैदको फैसला सुनाएको हो ।

रेशम चौधरीका अलावा हरिनारायण चौधरी, राजकुमार कठरिया, सुन्दरलाल कठरिया, ब्रिजमोहन डंगौरा, राजेश चौधरी, वीरबहादुर चौधरी, प्रदीप चौधरी, विद्रोह भनिने सीताराम चौधरी, श्रवण चौधरी र गंगाराम डंगौरालाई मुलुकी ऐन, ज्यानसम्बन्धी महलको दफा १३ (३) बमोजिम जन्मकैदको फैसला सुनाइएको छ । यी प्रतिवादीमध्ये श्रवण चौधरी नाबालक देखिएकोले निजलाई बालबालिका सम्बन्धी ऐन २०४८ को दफा ११ (३) अनुसार आधा सजायँ अर्थात् १० वर्ष कैद हुने फैसलामा उल्लेख छ ।

त्यस्तै, प्रतिवादीहरू लक्ष्मण थारु, लाहुराम चौधरी, रामकुमार कठरिया, सन्तराम चौधरी, विश्राम भनिने जीतबहादुर डंगौरा, प्रेमबहादुर चौधरी, किसनलाल चौधरी, दिलबहादुर चौधरी, संगम भनिने सन्तोष चौधरी, विश्राम चौधरी, चुन्नीराम चौधरी र रामप्रसाद चौधरी समेत १२ जनालाई मुलुकी ऐन ज्यान सम्बन्धी महलको १७ (३) नम्बरबमोजिम ३ वर्ष कैद हुने ठहर अदालतले गरेको छ ।

यी प्रतिवादीमध्ये चुन्नीराम चौधरी २०७५ फागुन ३० गते थुनामुक्त हुने र अन्य ११ जनाको कैद अवधि भुक्तान भईसकेकाले बुधबार नै थुनामुक्त गर्ने फैसला अदालतले सुनाएको छ ।

प्रतिवादी करन चौधरीलाई बालबालिका ऐन, २०४८ को दफा ११ (२) बमोजिम ६ महिना कैद हुने ठहरेकोमा निजको पनि कैद भुक्तान भैसकेकोले आजै थुनामुक्त हुनेछन् ।

अन्य प्रतिवादी नुरुलअलि जागा भन्ने तहाँवर अलिजागा, विश्राम चौधरी (कुश्मी) र रामनरेश चौधरीले सफाई पाएको जिल्ला अदालत कैलालीका श्रेष्तेदार इन्द्र कठायतले जानकारी दिए ।

श्रेष्तेदार कठायतका अनुसार प्रस्तुत मुद्दामा कर्तव्य ज्यान, ज्यान मार्ने उद्योग र डाँका चोरी गरी ३ वटा बारदातको अभियोग लगाइएकोमा डाँका चोरीतर्फ सबै जनाले सफाई पाएका छन्, भने कर्तव्य ज्यान तथा जन्मकैद हुने ठहरेका १० जना प्रतिवादीले ज्यान सम्बन्धी महलको १५ नम्बरको कसुर अपराधमा तजविजी ५ वर्ष समेत थप सजाय र नाबालक श्रवण चौधरीलाई २ वर्ष ६ महिना कैद हुने ठहरे पनि मुलुकी ऐन दण्ड सजायको ४१ नम्बर बमोजिम ठूलो कलमको कैद तोकिएकोले प्रस्तुत कैद तोकी रहनु नपर्ने समेत फैसाला भएको छ ।

फरार रहेका ३१ जनाको मद्दा मुलतवीमा राखिएको छ ।