पथरी- मोरङको पथरी शनिश्चरेमा शनिवार बिहान मृत भेटिएकी २९ वर्षीया व्यवसायी रुपा (रिना) बस्नेतको घटनाको वास्तविकता सार्वजनिक गर्न माग गर्दै आन्दोलन गरेको स्थानीयले सोमवार संघर्ष समिति गठन गर्दै चक्काजाम फिर्ता लिएका थिए ।

मंगलवार बिहान ९ बजेसम्म प्रहरीले सत्यतथ्य सार्वजनिक नगरे थप संघर्षका कार्यक्रम घोषणा गर्दै उद्योग वाणिज्य संघ पथरीकी पूर्व वरिष्ठ उपाध्यक्ष कविता पराजुलीको संयोजकत्वमा २५ सदस्यीय संघर्ष समिति गठन गरेर दाेषी पत्ता लगाउनुपर्ने माग राख्दै पथरी बजारवासी आन्दाेलित भएका हुन् । यसैबीच प्रहरी र स्थानीयबीच झडप समेत भएको छ । स्थिति नियन्त्रणमा लिन प्रहरीले दुई राउण्ड अश्रु ग्यास प्रहार गरेको मोरङका एसपी मनोज केसीले लोकान्तरलाई जानकारी दिए । 

दिनप्रतिदिन हत्या र हिंसा बढेको भन्दै पथरीका व्यवसायीसहित स्थानीय सडकमा उत्रिएका हुन् । सडकमा टायर बालेर उनीहरूले नाराबाजी समेत गरेका छन् । विरोधका कारण पूर्व-पश्चिम राजमार्ग समेत अवरुद्ध भएको छ ।

सोमबार उद्योग वाणिज्य संघको पहलमा ध्यानाकर्षण पत्र बुझाएसँगै प्रहरी प्रशासनले गुनासो सुन्न नखोजेकाे उनीहरूकाे आराेप छ । आन्दोलित स्थानीयले महेन्द्र राजमार्ग अन्तर्गत पथरी सडकखण्ड अवरुद्ध गर्दै नाराबाजी गरेका छन् ।

इलाका प्रहरी कार्यालय पथरीका प्रहरी निरीक्षक कमल बजगाँईको राजीनामा समेत माग गरेका छन् । आक्रोशित भिडले हत्यारालाई कारवाही, शान्ति सुरक्षा कायम, प्रहरी प्रशासन मुर्दावाद लगायतका नाराबाजी गरेका छन् ।

सडक जाम गर्ने क्रममा प्रहरी र स्थानीयबीच झडप समेत भएको छ । शनिवार बिहान नग्न अवस्थामा मृत फेला परेकी रुपा बस्नेतका आफन्त र स्थानीय बासिन्दाले प्रहरीविरुद्ध प्रर्दशन गर्नुका हत्यारा पक्राउ गर्न माग समेत गरेका छन् ।

शुक्रवार राति पथरी १ मा कस्मेटिक पसल सञ्चालन गर्दै आएकी २९ वर्षीया रिना बस्नेतको हत्यामा संलग्नलाई पक्राउ गरी कारवाही नगरेको भन्दै पथरी बजार अशान्त बनेको हो ।

प्रर्दशनमा उत्रिएका स्थानीयले नाराबाजीसहित राजमार्ग बन्द गरेका हुन् । आन्दाेलनरत पक्षले पथरी नगरपालिकाका मेयर र उपमेयरलाई कार्यालयबाट निकाल्दै आन्दाेनलमा हाेमिन आग्रह गरेका छन् ।  मेयर दिलिप राई र उपमेयर यमुना विष्टले कार्यालय परिसरमै आन्दाेलनलाई सम्बाेधन गरेका छन् । पथरीमा यातायत तथा पसलहरू बन्द गराएका छन् ।