काठमाडौं- प्रदेश नं ३ का मुख्यमन्त्री डोरमणि पौडेल परिवर्तनको शुरूआत आफैंबाट गर्नुपर्ने बताएका छन् ।

प्रदेश नं ३ को उद्योग, पर्यटन, वन तथा वातावरण मन्त्रालय र त्रिभुवन विश्वविद्यालयको विज्ञान तथा प्रविधि अनुसन्धान केन्द्रले मंगलावर खुमलटारस्थित राष्ट्रिय प्रकृति संरक्षण कोषमा आयोजना गरेको ‘राष्ट्रिय युवा वैज्ञानिक सम्मेलन–२०७६’ को उद्घाटन गर्दै उनले विज्ञान र प्रविधिको विकासका लागि परम्परागत सोच तोडेर अघि बढ्नुपर्नेमा जोड दिए । 

मुख्यमन्त्री पौडेलले सङ्घीय सरकारभन्दा प्रदेश सरकार नयाँ भएकाले यो एकवर्ष संरचना र ऐन नियम बनाउन लागिएको बताए । सरकार गठन हुँदासम्म कहाँ बस्ने र कोसँग शपथ लिने भन्नेसम्मको अन्यौलता रहेको उनले बताए । अहिले आवश्यक पर्ने ऐन, नियमको निर्माण भइरहेको उनले बताए ।  

उनले भने, 'सबै चुनौती सामना गर्दै अहिले हामी यो अवस्थामा आइपुगेका छौं ।' नेपाल विज्ञान तथा प्रविधि प्रतिष्ठान (नास्ट)ले अपेक्षाकृत काम गर्न नसकेको उनले औंल्याए । नास्ट परिणाममुखी काममा लाग्नुपर्नेमा उनको जोड छ । नास्टले विज्ञान र प्रविधिलाई उत्पादनसँग जोड्नुपर्ने उनले औंल्याए ।  

सङ्घीय सरकारको शिक्षा, विज्ञान तथा प्रविधि मन्त्रालयका सचिव कृष्णराज जिसीले अहिले नेपालमा एक तिहाइ युवा जनसङ्ख्या हुनु देश विकासका लागि सम्भावनाका रूपमा रहेको औल्याए । विज्ञान र प्रविधिका क्षेत्रमा अनुसन्धान गर्नका लागि प्रदेशस्तरमा संरचना आवश्यक रहेको उनले बताए । उनले भने, 'संरचना निर्माण गर्न र सञ्चालनका लागि सङ्घ र प्रदेश सरकार दुवैको समन्वयको खाँचो छ ।'