विराटनगर– प्रदेश नम्बर १ को प्रदेशसभामा आइतवार सार्वजनिक गरिएको बजेटमा प्रदेश निर्वाचन क्षेत्र पूर्वाधार विकास कार्यक्रमका लागि २ करोड ५० लाख रुपैयाँका दरले प्रत्येक निर्वाचन क्षेत्रमा समानरूपमा बजेट व्यवस्था गरिएको छ ।

यसका लागि १ अर्ब ४० करोड रुपैयाँ बजेट विनियोजन गरी निर्वाचन क्षेत्र विकास कार्यक्रमको रुपमा प्रदेशसभाका सदस्यको सिफारिशमा ५० लाख रुपैयाँका दरले योजना कार्यान्वयन गर्न ४८ करोड रुपैयाँ बजेट विनियोजन भएको छ ।

मानव संशाधनको प्रक्षेपण गरी आवश्यक जनशक्ति उत्पादन गर्न मनमोहन प्राविधिक विश्वविद्यालय स्थापनाका लागि १६ करोड ५० लाख रुपैयाँ, मदन भण्डारी प्रद्योगिक महाविद्यालय सेवा विस्तार गर्न १ करोड रुपैयाँ, मनमोहन प्राविधिक विद्यालयको आङ्गिक क्याम्पस सञ्चालन गर्न ५ करोड रुपैयाँ, प्राविधिक शिक्षा तथा व्यावसायिक तालीम कार्यक्रमसहित प्राविधिक विद्यालय रत्नकुमार वान्तवा, प्राविधिक शिक्षालय इलाम, शैलजा आचार्य प्राविधिक शिक्षालय मोरङ, उत्तरपानी प्राविधिक शिक्षालय धनकुटा, सुम्निमा प्राविधिक शिक्षालय भोजपुर, मौरेगढी प्राविधिक शिक्षालय खोटाङलाई अनुदान उपलब्ध गराउन ३८ करोड ६९ लाख रुपैयाँ, विद्यालय गुणस्तर सुधार अभियान सञ्चालनका लागि १७ करोड रुपैयाँ, विद्यालयमा नर्सिङ सेवा थप विस्तार गर्न २ करोड रुपैयाँ, प्रदेशमा रहेका सामुदायिक क्याम्पसहरुको स्तरोन्नति र संस्थागत सुदृढीकरणका लागि अनुदान उपलब्ध गराउन ४ करोड ५० लाख रुपैयाँ, धनकुटामा निजामती कर्मचारी आवासीय विद्यालय सञ्चालनका लागि १ करोड रुपैयाँ व्यवस्था गरिएको छ ।

प्रारम्भिक बालविकास केन्द्रका बालशिक्षिकाहरू र महिला स्वास्थ्य स्वयंसेविकालाई प्रोत्साहन गर्न ५ करोड ५० लाख रुपैयाँ बजेट विनियोजन गरी समग्रमा शिक्षा क्षेत्रका लागि प्रदेश सरकारले २८ अर्ब २८ करोड रुपैयाँ बजेट प्रस्ताव गरेको छ ।

स्वास्थ्य प्रवद्र्धनका लागि प्रदेशका विभिन्न ४ ठाउँमा खुला व्यायामशाला स्थापना गर्न १ करोड, जिल्ला अस्पतालको भौतिक तथा प्राविधिक विकासका लागि ६ करोड, धनकुटामा विभिन्न विशेषज्ञ सेवासहितको शिक्षण अस्पताल सञ्चालन गर्न ४ करोड रुपैयाँ, विपन्नवर्ग तथा असहायलाई जिल्ला अस्पताल एवं विभिन्न स्वास्थ्य संस्थामार्फत निःशुल्क औषधिको व्यवस्था गर्न ५ करोड रुपैयाँ, आयुर्वेदिक औषधि अन्वेषण, उत्पादन र प्रशोधनको व्यवस्था गर्न ४ करोडसहित स्वास्थ्य क्षेत्रको विकासका लागि १ अर्ब ७ करोड रुपैयाँ बजेट व्यवस्था भएको छ ।

खानेपानी तथा सरसफाइ क्षेत्रमा सरकारले ३ अर्ब रुपैयाँ बजेटको प्रस्ताव गर्दै श्रम र रोजगारीमा युवा लक्षित सीप विकास तालीम सञ्चान गरी दक्ष जनशक्ति उत्पादन गर्न ४ करोड रुपैयाँ, मुख्यमन्त्री युवा उद्यमशीलता कार्यक्रम सञ्चालन गर्न २० करोड रुपैयाँ बजेटको व्यवस्था गरिएको छ ।

महिला बालबालिका तथा ज्येष्ठ नागरिक, असाहय तथा अपाङ्गता भएका व्यक्ति, लैङ्गिक हिंसापीडित महिला तथा बालिकाको संरक्षणका लागि दीर्घकालीन पुनःस्थापनागृह सञ्चालन गर्न १ करोड ४० लाख रुपैयाँ, प्रदेशभित्रका ९० वर्ष उमेर पुगेका ज्येष्ठ नागरिकलाई सम्मानस्वरुप ५ हजार वार्षिक, ज्येष्ठ नागरिक ग्राम स्थापना गर्न २ करोड, छुवाछूतमुक्त प्रदेश बनाउन कार्यक्रम सञ्चालनका लागि १ करोड ४० लाख बजेट विनियोजन भएको छ । – मोहम्मद सदलरुल, मनोज दाहाल/रासस