काठमाडौं – आईसीसी टी–ट्वान्टी विश्वकप एशिया क्षेत्र छनोटअन्तर्गत शुक्रवार भएको खेलमा कुवेतले कतारलाई १० रनले पराजित गर्दै विजयी भएको छ । 

सिंगापुरको इण्डियन एसोसिएशन क्रिकेट मैदानमा टस हारेर पहिला ब्याटिङ गरेको कुवेतले निर्धारित २० ओभरमा ७ विकेट गुमाउँदै १ सय ९७ रनको योगफल बनायो ।

कुवेतका लागि अदनान आर्डिसले ५६ रनको उत्कृष्ट इनिङ खेले भने मिट भावसारले ३५ तथा उस्मान वहीदले २८ रनको योगदान दिए । बलिङतर्फ कतारका लागि तमोर सज्जाद र इकवाल हुसेनले समान २/२ विकेट लिए । 

जीतका लागि १ सय ९८ रनको विजयी लक्ष्य बोकेर मैदान उत्रेको कतार निर्धारित २० ओभरमा ५ विकेट गुमाउँदै १ सय ८७ रनमा समेटियो । कतारका लागि तमोर शज्जादले सर्वाधिक ४६ रनको योगदान दिए भने नोमान शनवारले ३४, इनाम उक हलले  २८ तथा फैसल जाभेदले २५ रन जोडे । 

कुवेतका शिराज खान र जनदु हमौदले २/२ विकेट झारे । यस हारसँगै ३ खेल खेलेको कतार १ खेलमा जीत तथा २ खेलमा हार व्यहोर्दै २ अंक जोडेको छ । अंक तालिकाको अन्तिम स्थानमा रहेको कतार प्रतियोगिताबाट लगभग बाहिरिएको छ ।

नेपालको अघिल्लो चरण प्रवेशको सम्भावना भने कायमै रहेको छ । यसअघि २ खेल खेलेको नेपालले १ खेलमा हार तथा १ खेलमा जीत हासिल गरेको छ । नेपाल पहिलो खेलमा कतारसँग पराजित भएको थियो भने दोस्रो खेलमा नेपालले मलेसियालाई पराजित गरेको थियो । नेपाल अंक तालिकाको चौथो स्थानमा छ ।

प्रतियोगितामा नेपालसहित मलेसिया, कतार, आयोजक सिंगापुर र कुवेत सहभागी छन् । उक्त प्रतियोगिताको विजेता टोलीले विश्वकपको ग्लोबल छनोटमा सहभागिता जनाउनेछन् । जारी प्रतियोगितामा आयोजक सिंगापुरले ३ अंक जोड्दै अंक तालिकाको शीर्ष स्थानमा छ भने समान ३ अंक नै जोडेको कुवेत नेट रन रेटको आधारमा दोस्रो स्थानमा छ । २ अंक बटुलेको मलेसिया नेट रन रेटका आधारमा तेस्रो स्थानमा छ । नेपालले आफ्नो तेस्रो खेल शनिवार कुवेतसँग खेल्ने छ ।