प्रधानमन्त्री केपी शर्मा ओलीले नेपाल पछिल्लो पटक उच्च आर्थिक बृद्धिदर हासिल गरिरेहका विश्वका १० प्रमुख मुलुकको पंक्तिमा समावेश भएको भन्दै संसदमा चर्चा गरेका छन्।

शनिबार प्रतिनिधिसभा बैठकमा सरकारका २ वर्षे कामको उपलब्धि सुनाउने क्रममा प्रम ओलीले भने,‘गणतन्त्र स्थापना पछिको एक दशकसम्म आर्थिक बृद्धि दर ४ प्रतिशत मात्र थियो। कुनै वर्ष त हाम्रो आर्थिक बृद्धिदर ०.७४ प्रतिशत मात्रै पनि थियो । अहिले ३ वर्षयता लगातार ६.५ प्रतिशतभन्दा माथिको आर्थिक वृद्धि रहेको छ।’

गत वर्ष नेपालको आर्थिक वृद्धिदर ७.१ प्रतिशत थियो। यो वर्ष ८.५ प्रतिशतको आर्थिक वृद्धिदरको लक्ष्य लिइएकोमा प्रम ओलीले लक्ष्य प्राप्ति हुने वा नहुनेबारे चर्चा गरेनन् । किनकी यो वर्ष कृषि क्षेत्रको उत्पादनमा गिरावट, पूर्वाधार निर्माणमा सुस्ती,  कर्जा प्रवाहमा गिरावट, राजस्व संकलन घट्नु लगायत कारणले लक्ष्य प्राप्तिमा आशंका गर्ने ठाउँ छ।

बरु प्रधानमन्त्री ओलीले विगत ३ वर्षदेखि कुनैपनि प्रदेशमा आर्थिक बृद्धिदर ६ प्रतिशतभन्दा न्यून नरहेको र यो २ वर्षमा प्रतिव्यक्ति कूल राष्ट्रिय आम्दानी १८ प्रतिशत भन्दा माथि बढेको भन्दै सरकारले राम्रो काम गरेको भनेर दर्साउन खोजे।

प्रम ओलीले आर्थिक वृद्धिदरमा आएको सुधारसँगै प्रत्येक वर्ष गरिबीको रेखामुनी रहने प्रतिशत, जनसंख्याको १.५ विन्दुले घटेको बताए।

‘आर्थिक वर्ष २०४७ सालतिर निरपेक्ष गरिबीको रेखामुनी रहनेको संख्या, कूल जनसंख्याको ४२ प्रतिशत थियो। संख्यामा बोल्ने हो भने करिब ८० लाख जनसंख्या गरिबीको रेखामुनी थिए,’ उनले भने, ‘आर्थिक वर्ष २०७६ को अन्त्यतिर जनसंख्याको १६.५ प्रतिशत अर्थात करिब ४८ लाख गरिबीको रेखामुनी रहने अनुमान छ। अब हामी गरिबी निवारण मात्रै होइन, उन्मूलन नै गर्नेगरी अघि बढ्छौं।’

जनता आवास तथा सुरक्षित बस्ती विकास कार्यक्रम, श्रमिक वर्गको न्यूनतम ज्यालामा भएको वृद्धि, स्वास्थ्य बीमा र सामाजिक सुरक्षा कार्यक्रमको विस्तारले न्यून आय भएका जनतालाई थप राहत पुगेको उनको भनाइ छ। प्रम ओलीले भने, ‘गरिबी घटाउन सहयोग पुगेको छ, रोजगारीको अवसर बढेको छ । यसबाट उत्पादकत्व बृद्धिमा मात्रै मद्दत पुगेको होइन, समग्रमा आर्थिक असमानता नै घटेको छ।’

प्रत्येक ३ प्रतिशतको आर्थिक वृद्धिले रोजगारीमा कम्तिमा १ प्रतिशतले बृद्धि गर्छ भन्ने मान्यता छ। उनले भने, ‘हामी ६.५ देखि ७ प्रतिशतको आर्थिक वृद्धि गरिरहँदा त्यही अनुपातले हेर्ने हो भने पनि रोजगारीको बृद्धि स्वभाविक रुपमा २ देखि ३ प्रतिशतको बीचमा हुन्छ।’

उनले त्यसको अर्थ श्रम बजारमा प्रवेश गर्ने जनशक्तिलाई रोजगारी दिन सकेको जिकिर गर्दै ओलीले भने, ‘हाम्रो श्रम बजारमा जति जनशक्ति प्रवेश गर्छन्, त्यो श्रमशक्तिलार्ई नयाँ रोजगारीले भेट्ने भेट्ने स्थितिमा छ। श्रम बजारमा पहिले भएका बेरोजगारले काम नपाएका होलान्, तर नयाँ बेरोजगार थपिएका छैनन्।’अहिले बेरोजगारहरुको तथ्यांक श्रम मन्त्रालयले संकलन गरिरहेको जनाइएको छ।