अमेरिकी सहयोग परियोजना मिलेनियम च्यालेन्ज कर्पोरेशन ‘एमसीसी’ अध्ययन गर्न सत्तारूढ दल नेकपाले गठन गरेको कार्यदलले अध्यक्षद्वय पुष्पकमल दाहाल ‘प्रचण्ड’ र केपी शर्मा ओलीलाई आफ्नो प्रतिवेदन बुझाएको छ ।

शुक्रवार साँझ प्रधानमन्त्रीनिवास बालुवाटारमा कार्यदलका संयोजक झलनाथ खनालले अध्यक्षद्वयलाई प्रतिवेदन हस्तान्तरण गरेका हुन् ।

गत माघ १९ गते सम्पन्न नेकपा केन्द्रीय कमिटीको दोस्रो पूर्ण बैठकले एमसीसी अध्ययन गरेर सुझाव दिन खनालको नेतृत्वमा स्थायी कमिटी सदस्यद्वय भीम रावल र परराष्ट्रमन्त्री समेत रहेका प्रदीप ज्ञवालीसम्मिलित कार्यदल गठन गरेको थियो ।

प्रतिवेदन सार्वजनिक भने गरिएन । ‘शुरूमा अध्यक्षद्वयले हेर्नुहुन्छ, त्यसपछि सचिवालयमा पेश हुन्छ र बिस्तारै सार्वजनिक होला,’ बालुवाटार स्रोतले भन्यो ।

संयोजक खनालले भने यथास्थितिमा एमसीसी संसदबाट पारित नहुने बताएका छन् । ‘यथास्थितिमा यो पारित हुँदैन,’ खनालले भने, ‘हामीले प्रतिवेदनमार्फत सुझावहरू दिएका छौं । सम्झौतालाई सुधार नगरी पास गर्न नमिल्ने प्रतिवेदनले निष्कर्ष निकालेको छ ।’

खनालले कार्यदल केन्द्रीय कमिटीले गठन गरेको र शक्तिशाली भएकाले कार्यदलको निष्कर्ष नेकपाले पालना गर्ने दाबी गरे ।