सभामुख अग्निप्रसाद सापकोटाले पेट्रोलियम पदार्थमा गरिएको करवृद्धिबारे सदनलाई जानकारी गराउन सरकारको ध्यानाकर्षण गराएका छन् ।

पेट्रोलियम पदार्थमा पूर्वाधार कर लगाएर सरकारले जनतालाई बोझ थपेको भन्दै समाजवादी पार्टीले लगातार २ दिनसम्म सरकारको जवाफ मागेपछि सभामुखले रुलिङ गरेका हुन् ।

सोमवार बसेको प्रतिनिधि सभा बैठकको शुरूमै सभामुखसँग समय लिएर बोल्दै समाजवादी पार्टीकी सांसद सरिता गिरीले सरकारले लगाएको दोहोरो करको मारमा जनता थिचिएको बताइन् ।

‘सरकारले संसारमा कतै नभएको दोहोरो कर इन्धनमा लगाएर जनतालाई भार थपेको छ । प्रदूषण कर लिएपनि विश्वको अत्यन्त दूषित शहरमा काठमाडौं पर्ने गरेको छ, करको सदुपयोग भएको छैन,’ गिरीले भनिन्, ‘जनतामाथि कर लगाउने अधिकार संसद्‍मा रहेको र संसद्को अधिकारलाई सरकारले ढाँटेका कारण सभामुखमार्फत सदनमा सरकारको जवाफ चाहन्छौं ।’