राष्ट्रिय सभाका १९ सांसदको दुई वर्षे कार्यकाल आज सकिँदैछ ।

२०७४ फागुन २१ गते पद तथा गोपनीयताको शपथ गरेका १९ सांसदको कार्यकाल सकिन लागेको होे ।

नयाँ संविधान जारी भएपछि पहिलोपटक गठन भएको राष्ट्रिय सभामा सांसदहरूको कार्यकाल गोलाप्रथाका आधारमा तय गरिएको थियो ।

कुल ५९ सांसदमध्ये २० जनाको कार्यकाल ६ वर्ष, २० जनाको कार्यकाल ४ वर्ष र १९ जनाको कार्यकाल २ वर्ष तय भएको थियो ।

राष्ट्रिय सभामा अब निर्वाचित हुने सबै सदस्यको कार्यकाल ६ वर्ष नै कायम हुनेछ ।

आज कार्यकाल सकिनेमा अर्थमन्त्री युवराज खतिवडा पनि छन् ।

यसैगरी राष्ट्रिय सभामा निकै कमजोर उपस्थिति रहेको कांग्रेसका १३ मध्ये ७ सांसदको कार्यकाल आज सकिँदैछ ।

कांग्रेस संसदीय दलका नेता सुरेन्द्रराज पाण्डे, सचेतक सरिता प्रसाईं तथा सांसदहरू बद्री पाण्डे, मुक्ताकुमारी यादव, धना खतिवडा, बृन्दाराना मगर र दुर्गा उपाध्यायको कार्यकाल सकिन लागेको हो ।

अब राष्ट्रिय सभामा कांग्रेसका ६ सांसद मात्र रहने छन् ।

कार्यकाल सकिन लागेका सांसदहरूले आज दिउँसो २ बजे बस्ने राष्ट्रिय सभा बैठकमा बिदाइ सम्बोधन गर्ने छन् ।

आज रिक्त हुन लागेका १९ मध्ये १८ सांसद निर्वाचित भइसकेका छन्, उनीहरूको शपथ भोलिका लागि तोकिएको छ ।

राष्ट्रपतिबाट मनोनित भएका युवराज खतिवडाको स्थानमा भने नयाँ नाम सिफारिश भइसकेको छैन । 

उपाध्यक्ष बामदेव गौतमलाई मनोनित गर्ने सत्तारुढ दल नेकपा सचिवालयको निर्णय र खतिवडालाई नै निरन्तरता दिने प्रधानमन्त्री केपी शर्मा ओलीको अडानका कारण यो विषय अनिर्णित छ ।

यी हुन्, घर फर्किन लागेका सांसदहरू :

हरिचरण शिवाकोटी, रमेशप्रसाद यादव, बलरामप्रसाद बाँस्कोटा, सुरेन्द्रराज पाण्डे, दुर्गाप्रसाद उपाध्याय, कालिबहादुर मल्ल, बद्रीप्रसाद पाण्डे, डा. युवराज खतिवडा, सरिता प्रसाई, मुक्ताकुमारी यादव, धनकुमारी खतिवडा, विन्दादेवी आले, मीना बुढा, युटोल तामाङ, कमलाकुमारी ओली, खेमराज नेपाली, रामप्रीत पासवान, राजकुमार कुँवर र वृषेशचन्द्र लाल ।