अछाम जिल्लाको कालिका स्थानकी उमा थापा काखे छोरासहित सोमवार नै कैलालीको सीमानाका गौरीफन्टा पुगिन् ।

रोजगारीको क्रममा भारतको बेङलुरु बस्दै आएकी उनी कोरोनाको त्रास फैलिएपछि फर्किएकी हुन् तर जिल्ला प्रशासन कार्यालय कैलालीले सोमवारदेखि नै जिल्लामा लागू गरेको निषेधाज्ञा र सरकारले मंगलवारदेखि देश नै लकडाउन गरेपछि उनी दशजगामा अलपत्र परेकी हुन् ।

आफन्तले घर फर्किन भनेपछि हिँडेकी सीमा नाकामै अलपत्र परेकी छन् ।

कैलालीको टीकापुर नगरपालिका–१ का ओमप्रकाश राजवंशी भारतको कर्नाटक राज्यको बेलगामबाट फर्किएका छन् तर प्रशासनले नेपाल प्रवेशमा रोक लगाएपछि उनी पनि दशगजामै अलपत्र परेका छन् ।

कालिका स्थानकी थापा र टीकापुरका राजवंशी मात्रै होइन, २ दिनदेखि सुदूरपश्चिम र कर्णाली प्रदेशका विभिन्न जिल्लासहित चितवन, पाल्पालगायत जिल्लाका नेपाली नेपाल–भारत दशगजा क्षेत्रमा सोमवारदेखि अलपत्र छन् । जसमा दुधेबालकदेखि वृद्धावृद्धा समेत रहेका छन् ।

कोरोना भाइरसको संक्रमण भारतमा उच्च दरले बढ्न थालेपछि त्रसित बनेका नेपाली स्वदेश फर्किने क्रम बढेको थियो ।

सशस्त्र प्रहरीका डीएसपी भीमबहादुर चन्दका अनुसार सयौंको संख्यामा फर्किएका नेपालीहरू सीमा क्षेत्रमा अलपत्र अवस्था छन् ।

मंगलवार बिहान सोही नाकामा तनाव सिर्जना समेत भएको थियो । सीमा नाकामा अलपत्र परेका उनीहरूले प्रहरीको सुरक्षा घेरालाई तोड्न खोज्दा तनाव सिर्जना भएको हो । माथिको कुनै आदेश नआएको भन्दै प्रहरीले उनीहरूलाई सुरक्षा घेरामा राखेको छ ।

उनीहरूलाई कतिबेला र कसरी छोड्ने भन्ने आदेश हालसम्म नआएको कैलालीका प्रमुख जिल्ला अधिकारी यज्ञराज वोहराले बताए । परिस्थितिबारे जानकारी दिएपनि आदेश प्राप्त नभएको उनले बताए ।

भारतबाट फर्किका नेपालीहरू सोमवार साँझदेखि नै २० घण्टा भोकै छन् । देश नै ‘लक–डाउन’ भएकाले बजार खुला छैन । उनीहरूले केही खान नपाउँदा भोक–भोकै घण्टौंदेखि सीमा नाकामै जोखिमबीच बसिरहेका छन् ।

यसबीच जिल्लामा रहेका मारबाडी संघ लगायत दिएको खाद्यान्न सामग्री उनीहरूले बहिस्कार गरेका छन् । प्रहरीको गाडीमा लिएका बिस्कुट, चाउचाउ, चिउरा, भुजा, पानी लगायतका खाद्यान्न राहत खान नमानेका हुन् । उनीहरूको एउटै माग छ, ‘हामीलाई नेपाल छिर्न दिनुहोस् ।’

प्रहरीले भने माइकिङ नै गरेर उनीहरूलाई खाद्यान्न राहत सामग्री लिन आग्रह गरिरहेका छन् ।

उता भारतमा र यता नेपालमा पूरै लक–डाउन भएपनि नेपालीहरूको फर्किने क्रम नरोकिएपछि सीमा नाकामा त्रास फैलिएको छ । रोगको संक्रमण फैलिएको भारतबाट सयौंको संख्यामा फर्किएका नेपालीबाटै रोगको संक्रमण फैलिने भन्दै त्रास फैलिएको छ ।

धनगढीबाट प्रकाशित हुने कैलाली दैनिकका प्रकाशक गणेश भण्डारीले यसरी फर्किरहेकाहरूबाट जोखिम बढेकाले फर्किएकाहरूलाई कडा क्वारेन्टाइनमा राखिनुपर्ने माग राखे ।