शनिवारका लागि तय भएको सचिवालय बैठकको पूर्वसन्ध्यामा सत्तारूढ दल नेपाल कम्युनिस्ट पार्टी (नेकपा)का शीर्ष नेताहरू छलफलमा जुटिरहेका छन् । बैठकको रणनीति बनाउन अध्यक्ष पुष्पकमल दाहाल ‘प्रचण्ड’सँग वरिष्ठ नेता माधवकुमार नेपाल समूहका ११ जना स्थायी कमिटी सदस्यले शुक्रवार छलफल गरेका हुन । 

स्थायी कमिटीका सदस्यको आग्रह अनुसार नेता नेपालले आफ्नै निवास कोटेश्वरमा प्रचण्डसँग स्थायी कमिटीका सदस्यहरुसँग छलफल गराएका हुन । 

नेपाल समूहका स्थायी कमिटी सदस्यहरूले बुधवार बसेको सचिवालय बैठकको यथार्थता माग गरेका थिए ।

‘अस्तिको बैठकमा केके भएको हो हामीलाई यथार्थ चाहियो भनेर हामीले दुवै नेताहरूसँग माग गर्यौं,’ छलफलमा सहभागी स्थायी कमिटी सदस्य रघुजी पन्तले लोकान्तरसँग भने, ‘उहाँहरूले प्रधानमन्त्री ओलीबाट आएको प्रस्तावका बारेमा जानकारी गराउनु भयो ।’ 

सदस्यहरुले भोलिको बैठकबाट कुनैपनि हालतमा स्थायी कमिटीको मिति तोक्न प्रधानमन्त्री एवं अध्यक्ष केपी शर्मा ओलीलाई दबाब दिन आग्रह गरेका थिए ।

स्थाथी कमिटीको बैठकको मिति नतोकी हामी अरु विषयमा छलफल नै गर्दैनौ भन्ने अडान राख्न सुझाव दिएका छौैं छलफलमा सहभागि एक सदस्यले भने । 

स्थायी कमिटी बैठक माग गर्दै नेकपाका २० जना स्थायी कमिटी सदस्यहरूले हस्ताक्षरसमेत बुझाइसकेका छन् ।

छलफलमा सबै उपस्थित स्थायी कमिटी सदस्यहरूको एउटै स्वर थियो - स्थायी कमिटी बैठक बस्न पाउने अधिकार हामीलाई पार्टीको विधानले नै दिएको छ, यससम्बन्धमा प्रधानमन्त्री तथा अध्यक्षको धारणा के हो ? हामीले थाहा पाउनुपर्यो । 

प्रधामन्त्री ओलीको प्रस्तावअनुसार उपाध्यक्ष गौतमलाई प्रधानमन्त्री बनाउने विश्वसनीय आधार के हो भनेर खोज्न उनीहरूले नेताद्वयलाई सुझावसमेत दिएका छन् । 

गौतमलाई राष्ट्रिय सभामा लैजाने पार्टीको निर्णय प्रधानमन्त्री स्वयंले कार्यान्वयन गर्न नमानेको अवस्थामा प्रधानमन्त्री नै बनाइदिने विश्वसनीय आधार चाहिने उनीहरूको एकमत थियो । 

छलफलपछि दुवै नेताले प्रधानमन्त्री केपी शर्मा ओली नै एकताविरोधी क्रियाकलापमा लागेको निष्कर्ष निकालेका छन् । ओलीलाई जसरी पनि राजीनामा गराएर अघि बढ्ने सहमति भएको नेता नेपालनिकट एक स्थायी कमिटी सदस्यले लोकान्तरलाई बताए । 

बुधवारको सचिवालय बैठकमा ओलीले नेपाललाई तेस्रो अध्यक्ष बन्न प्रस्ताव गरेका थिए भने उपाध्यक्ष वामदेव गौतमलाई प्रधानमन्त्री बनाउने बताएका थिए । 

‘प्रधानमन्त्री ओलीको प्रस्ताव रणनीतिक भएको र आफूइतरका नेताहरूलाई फुटाउने आशयस्वरूप आएको हो भन्नेमा अध्यक्ष प्रचण्ड र वरिष्ठ नेता नेपाल सहमत हुनुहुन्छ,’ नेपालनिकट ती नेताले लोकान्तरसँग भने । 
अध्यक्ष प्रचण्ड र नेता नेपाल दुवै जना ओलीको प्रस्ताव कार्यान्वयनका लागि नभएकोमा स्पष्ट भएका छन् । 

उनीहरूबीच सचिवालय बैठकमा कसरी प्रस्तुत हुने भन्ने विषयमा पनि छलफल भएको थियो । ‘अध्यक्ष र प्रधानमन्त्री दुवै पदबाट राजीनामा दिनुपर्छ भन्ने बटमलाइनबाट नेताहरू पछि हट्नुभएको छैन,’ ती नेताले भने । 

छलफलमा अध्यक्ष प्रचण्ड र वरिष्ठ नेता नेपालसँगै स्थायी कमिटी सदस्य भीम रावल, घनश्याम भुसाल, शाक्य, रघुजी पन्त, युवराज ज्ञवालीलगायतका नेताहरू सहभागी थिए ।  

सरकारका गलत कामका कारण जनताबीच पार्टीको बदनाम भएको भन्दै प्रचण्ड नेपाल समूह ओलीलाई दुवैपदबाट राजीनामा गर्न दवाव दिएको छ ।