नेपाली कांग्रेसका महामन्त्री एवं सांसद डा. शशांक कोइरालाले विगतमा नतिजा दिन नसकेका कार्यकर्ता पोस्ने प्रधानमन्त्री कृषि आधुनिकीकरण कार्यक्रमलाई निरन्तरता नदिन सरकारको ध्यानाकर्षण गराएका छन् । उनले कोरोना संकटका कारण उद्योग धन्धालाई धराशायी हुन नदिन पनि सरकारको ध्यानाकर्षण गराए । 

सरकारका नीति तथा कार्यक्रममाथि प्रतिनिधि सभामा दोस्रो दिन सोमवारको छलफलमा भाग लिँदै कोइरालाले कर्मकाण्डी कार्यक्रम ल्याएर सरकार आममानिसको दुःखमा संवेदनशील नभएको आरोप लगाएका हुन् । उनले सांसदले दिएका सुझाव समेटेर बजेट ल्याउन पनि सरकारको ध्यानाकर्षण गराए । 

‘पहिलो प्राथमिकतामा कृषिलाई राखेर उपयुक्त कार्यक्रम ल्याउनुपर्नेमा विगतमा नतिजा दिन नसकेका कार्यकर्ता पोस्ने योजनाको रूपमा रहेको प्रधानमन्त्री कृषि आधुनिकीकरण जस्ता कार्यक्रमलाई निरन्ता दिइनु अत्यन्तै दुर्भाग्य छ,’ उनले भने ।

कोइरालाले वैदेशिक रोजगारीबाट फर्किन चाहनेका लागि स्वास्थ्य परीक्षण गराएर सुरक्षित तरबले घर फर्काउन सरकारसँग आग्रह गरे ।

महासंकटको अवस्थामा भोकमरी आउन नदिन कृषिमा लगानी बढाएर किसानलाई सहुलियत दिन उनले माग गरे ।

कांग्रेस महामन्त्री कोइरालाले कोरोनाविरुद्धको लडाईंमा खटिएका चिकित्सक, सुरक्षाकर्मी र सरसफाइमा कार्यरत कर्मचारीको मनोबल बढाउने गरी काम गर्न सरकारसँग आग्रह गरे ।