इटलीकी एक सांसदले अमेरिकी अर्बपति बिल गेट्सलाई खोप अपराधीको संज्ञा दिँदै उनी विश्वव्यापीकरणको एजेन्ट भएको आरोप लगाएकी छन् । 

बिल गेट्सले कोरोनाभाइरसविरुद्धको प्रयास जारी राख्दा उनको असली उद्देश्य के हो भन्ने विषयमा अनेकौं किसिमका षड्यन्त्र सिद्धान्तहरू देखापर्न थालेका छन् । उनीविरुद्ध अनेकथरी आरोप लगाइने क्रममा इटलीकी सांसद सारा कुनियालले निकै गम्भीर आक्षेप लगाइन् । 

संसदमा भावुकतापूर्ण बयान दिँदै उनले कोभिड–१९ विरुद्ध अनिवार्य खोप लगाउने कुनै पनि योजनाको विरोध गर्न अन्य सांसदहरूलाई अपील गरिन् । भ्रष्ट सम्भ्रान्तहरूले खोप लगाउने प्रयासलाई गति दिएको दाबी गर्दै उनले खोप अभियानका प्रमुख अपराधी बिल गेट्स भएको बताइन् ।

दशकौंदेखि गेट्सले विश्वको जनसंख्या घटाउने तथा खोप कार्यक्रम अघि बढाउने गरिरहेका छन् ।

पश्चिममा खोपविरोधी एउटा जमात निकै सक्रिय छ र कुनियाल पनि त्यसको सदस्य हुन् । अल्पविकसित देशहरूमा खोप अभियान चलाउने गेट्सलाई कुनियलले खलनायकका रूपमा प्रस्तुत गरेकी हुन् । 

अफ्रिकाका लाखौं महिलामा वन्ध्याकरण अभियान चलाएको र भारतमा सयौं हजार बालबालिकालाई पक्षघात गराएको आरोप गेट्समाथि लगाउँदै उनले जीएमओ र ५जी प्रविधि पनि गेट्सकै अपराध भएको बताइन् । यी अपराधका लागि गेट्सलाई कारागारमा कोच्नुपर्ने उनको भनाइ छ ।

उनले कोरोनाभाइरस रोक्न लगाइएको बन्दाबन्दीको पनि कडा आलोचना गरिन् । कुनियालका अनुसार, आइसोलेसनले पनि विश्वव्यापीकरणका हिमायतीहरूको एजेन्डालाई अघि बढाउँछ अनि इटालेलीहरू झूटो विज्ञानको केरकारमा परेका हुन् । 

उनले संसदमा बोलिरहँदा केही सांसदले हल्लाखल्ला गरेका थिए तर सभामुखले शान्ति बहाल गर्न भने । खुला संसदमा सबैले आफ्नो विचार राख्ने अधिकार पाउने भनी सभामुखले बताएपछि परर ताली बजाइएको थियो ।