बेइजिङमा रहेको एक विश्वविद्यालयको विशिष्ट अनुसन्धान टोलीले कोभिड–१९ का रोगीहरू निको हुने समयलाई छोट्ट्याउने र भाइरसबाट अल्पकालीन प्रतिरोधक क्षमता दिने औषधि विकसित गरिरहेको दाबी गरेको छ । 

यो औषधि पेकिङ विश्वविद्यालयको बेइजिङ एड्भान्स्ड इन्नोभेसन सेन्टर फर जिनोमिक्सले परीक्षण गरिरहेको हो । उसले जनावरहरूमा यसको सफल परीक्षण गरिसकेको छ । 

‘सन्नी सिएको नेतृत्वमा एक संयुक्त अनुसन्धान टोलीले कोरोनाभाइरसविरुद्ध शक्तिशाली एन्टीबडीहरूको पहिचान गरेको छ,’ विश्वविद्यालयले सोमवार एक बयान जारी गरेर जानकारी दियो । 

अन्लाइन मेडिकल जर्नल सेलमा प्रकाशित उक्त अनुसन्धान निष्कर्षमा लेखिएको छ, ‘शक्तिशाली एन्टीबडीलाई रोग लागेपछिको उपचार र रोग लाग्न नदिने रोकथाम दुवैको सन्दर्भमा काम लाग्ने औषधि बनाउनका लागि उपयोग गर्न सकिन्छ ।’

‘कोभिड–१९ महाव्याधि जाडो महिनामा पुनः प्रकट भएमा हाम्रो एन्टीबडी त्यतिखेरसम्म उपलब्ध हुन सक्छ,’ सिएले बयानमा लेखे । 

‘हामीले यी एन्टीबडीहरू संक्रमित मुसामा प्रवेश गराउँदा भाइरसको भार २५ सयको फ्याक्टरले घटेको पायौं,’ सिएले एएफपी समाचार संस्थासँग कुराकानी गर्दै भने ।

‘यसको अर्थ हुन्छ– यो सम्भावित औषधिले उपचार गर्न सक्छ,’ उनले थपे । 

औषधिमा न्युट्रलाइजिङ एन्टीबडीज उपयोग गरिएको छ । त्यो कोषिकाहरूलाई संक्रमित गर्ने भाइरसको रोकथाम गर्न मानव शरीरको रोगप्रतिरोधक प्रणालीबाट बनेको हुन्छ । कोरोनाबाट निको भएका ६० जना रोगीको रगतबाट सिएको टोलीले त्यसलाई निकालेका हुन् ।