अमेरिकाका पूर्वराष्ट्रपति बिल क्लिन्टनका बारेमा हालै निस्केको एक पुस्तकले उनी मोनिका लेविन्स्की बाहेक अर्की एक महिलासँग पनि सम्बन्धमा रहेको खुलासा गरेको छ । 

बेलायतकी सम्भ्रान्त महिला गिसलेन म्याक्सवेलसँग पनि क्लिन्टनको सम्बन्ध रहेको र म्याक्सवेलले अमेरिकी लगानीकर्ता जेफ्री इपस्टाइनका लागि युवतीहरू पठाउने गरेको पनि पुस्तकमा उल्लेख गरिएको छ । 

"अ कन्भिनिएन्ट डेथ : द मिस्टिरियस डिमाइज अफ जेफ्री इपस्टाइन" नामक यो पुस्तक एलेन गूडम्यान र डेनियल हार्परले लेखेका हुन् । पुस्तकमा उल्लेख भएअनुसार, विदेशयात्रा गर्नका लागि क्लिन्टनले इपस्टाइनको जेट विमान प्रयोग गर्ने गरेका थिए । त्यतिखेर यात्रामा म्याक्सवेल पनि क्लिन्टनसँगै हुन्थिन् । 

बिल क्लिन्टन आफैंले इपस्टाइनको विमानमा चारपटक यात्रा गरेको स्वीकारे तर म्याक्सवेलसँग सम्बन्ध नरहेको चाहिँ नकारेका छन् । अनि इपस्टाइनको अपराधका बारेमा आफूलाई कुनै जानकारी नरहेको उनले बताएका छन् । 

इपस्टाइनले अमेरिकाको कारागारमा सन् २०१९ मा आत्महत्या गरेका थिए । 

म्याक्सवेलले इपस्टाइनका लागि युवतीहरू उपलब्ध गराउने उनीहरूले यौन शोषणमा सहभागी हुने गरेको आरोप छ र उनले यी आरोप अस्वीकार गरेकी छन् । 

बिल क्लिन्टनको सबभन्दा कुख्यात विवाहेतर सम्बन्ध चाहिँ ह्वाइट हाउसकी कर्मचारी मोनिका लेविन्स्कीसँग थियो । त्यस काण्डले उनलाई महाअभियोग समेत लगाएको थियो ।