प्रतिनिधि सभाको विकास तथा प्रविधि समितिले काठमाडौं–तराई फास्ट ट्र्याकको कार्यप्रगतिको अनुगमन गरेको छ । समितिको टोलीले आइतवार र सोमवार फास्ट ट्र्याकको स्थलगत अनुमगन गरेर कार्यप्रगतिबारे जानकारी लिएको हो । 

पूर्वप्रधानमन्त्री एवं नेकपा एसका अध्यक्ष माधव नेपाल पनि संसदीय अनुगमन टोलीमा सहभागि भएका छन् । प्रतिनिधि सभाको अन्तराष्ट्रिय सम्बन्ध समितिका सदस्य रहेका नेपाल विकास समितिको अनुगमनमा गएका हुन् । आफू प्रधानमन्त्री रहेको समयमा शिलान्यास गरिएको फास्ट ट्र्याक अनुगमनमा जान नेपालले रुची देखाएकोले आमन्त्रित सदस्यको रुपमा नेपाललाई टोलीमा राखिएको समिति स्रोतले लोकान्तरलाई बतायो ।  
समितिको सभापति नेकपा एसकी सांसद कल्याणी खड्का छन् । अनुगमन टोलीमा एमालेका गणेश पहाडी, यज्ञराज सुनुवार लगायत सहभागी थिए । 

तराईलाई राजधानी काठमाडौंसँग जोड्ने ७६ किलोमिटर लामो फास्ट ट्र्याक निर्माणको जिम्मा नेपाली सेनाले पाएको छ । २०६६ सालमा शिलान्यास भएको द्रुतमार्ग १२ वर्षसम्म पनि सम्पन्न हुन सकेको छैन । 
सेनाका अधिकारीहरुले विक्रम संवत् २०८१ मंसिर सम्ममा निर्माण सम्पन्न गर्ने बताएको छ । सो मार्ग अन्तरगत पर्ने सुरुङको ठेक्का पाएको चिनियाँ ठेकेदारका ५२ जना प्राविधिक आजमात्र काठमाडौं आइपुगेका छन् ।