विशेष अदालतमा प्रतिकूल वकपत्र गर्ने सरकारी साक्षीविरुद्ध अख्तियार दुरुपयोग अनुसन्धान आयोगले मंगलवार भ्रष्टाचार मुद्दा दर्ता गरेको छ । 

सरकारी साक्षीका रूपमा अख्तियारले पेश गरेका मो. अजरुद्दिन राइनले विशेष अदालत काठमाडौंमा वकपत्र गर्दा अनुसन्धानको क्रममा गरेको बयान कागजको प्रतिकूल वकपत्र गरेपछि उनीविरुद्ध पनि भ्रष्टाचारको मुद्दा दर्ता गरिएको आयोगले जनाएको छ । 

राईनविरुद्ध १५ हजार रूपैयाँ बिगो मागदाबी गर्दै अदालतमा मुद्दा दर्ता गरिएको छ । 

आयोगका प्रवक्ता श्यामप्रसाद भण्डारीका अनुसार महोत्तरीको जलेश्वरनाथ सब-डिभिजन वन कार्यालयका रेञ्जर (अधिकृतस्तर) रामअशिष यादवविरुद्ध महोत्तरीकै एकडारा गाउँपालिका-२ बस्ने मो. अजरुद्दिन राईनसँग काठसहित पक्राउ परेको ट्रयाक्टर छुटाइदिने भनेर घुस लिएको आरोपमा २०७६ फागुन ३० गते विशेष अदालतमा मुद्दा दर्ता गरिएको थियो ।

उक्त मुद्दामा सरकारी साक्षीका रूपमा राईन पेश गरिएका थिए । तर, उनले बयान कागजको प्रतिकूल हुने गरी वकपत्र गरेको अख्तियारको भनाइ छ ।