नेपाली कांग्रेसका सभापति एवं प्रधानमन्त्री शेरबहादुर देउवाले स्थानीय तहदेखि केन्द्रको चुनावसम्म सत्ता गठबन्धनका दलहरूबीच चुनावी तालमेल हुने बताएका छन् । 

लोकतन्त्र बचाउन गठबन्धनका दलहरूको भूमिका रहेको भन्दै उनले माओवादी र नेकपा एसलाई पनि उचित स्थान दिइने बताए । 

बिहीवार तनहुँमा कांग्रेसको जिल्ला समितिले आयोजना गरेको कार्यक्रममा सभापति देउवाले चुनावी तालमेलको पक्षमा अभिव्यक्ति दिएका हुन् ।

कांग्रेसकै कतिपय नेताहरूले तालमेलको विरोध गरिरहेको समयमा देउवाले सत्ता गठबन्धनका दलहरूबीच प्रतिनिधि सभाको चुनावसम्म तालमेल हुने बताएका हुन् । 

‘स्थानीय तहको चुनावमा मात्र नभई प्रदेश सभा र प्रतिनिधि सभाको चुनावमा पनि तालमेल हुन्छ, उहाँहरूलाई पनि उचित स्थान दिनुपर्छ,’ देउवाले भने ।

सभापति देउवाले यसअघि वीरगञ्जमा पुगेर पनि चुनावी तालमेलको पक्षमा बोलेका थिए । 

बिहीवार नै प्रधानमन्त्री पत्नी एवं कांग्रेस केन्द्रीय सदस्य डा. आरजु देउवाले पनि तीनै तहको चुनावमा तालमेल हुने बताएकी थिइन् ।

चुनावमा तालमेल गर्ने या नगर्ने लगायतका विषयमा छलफल गर्न कांग्रेस केन्द्रीय समितिको बैठक भोलि बस्दैछ ।