काठमाडौँ  उपत्यकाको फोहोर सिसडोल पुर्‍याउन फोहोर व्यवस्थापन गर्ने    मजदुरले    काभ्रेस्थली    मार्गबाट    फोहोर  सिसडोल  लैजान  थालेका  छन्  ।  

मङ्गलबार रातिदेखि बुधबार बिहानसम्म ८० कन्टेनर  फोहोर  काभ्रेस्थली  भएर  सिसडोल  लगिएको छ ।

फोहोर १० दिनदेखि उठ्न सकेको थिएन । सहरका  केही  भाग  अहिले  सफा  भएको  छ  ।  

वर्षा  र  सिसडोलका  स्थानीयको  सङ्घर्षको दोहोरो समस्याका कारण काठमाडौँ महानगरपालिकाका सडकमा थुप्रिएका फोहोर सिसडोल  डम्पिङ  साइट  लैजाने  कार्य  अरू  अनिश्चितजस्तै  थियो  ।

 फोहोर  व्यवस्थापन  गर्ने मजदुरले काभ्रेस्थलीको बाटो प्रयोग गरे, काठमाडौँ महानगरपालिका वातावरण विभाग प्रमुख सरिता राई भन्छिन् ।

काभ्रेस्थलीको यो बाटोमा कुनै अवरोध छैन ।

सिसडोल        पुग्ने        पासाङ        ल्हामु राजमार्गअन्तर्गत तिनपिप्ले–छहरे–मुड्खु सडक  खण्ड  कालोपत्रे  गर्ने  कार्य  वर्षाका  कारण रोकिने सम्भावना भने छ ।

त्यस्तै यो सडक खण्डमा बाटो मर्मत भएन भनेर भइरहेको सङ्घर्ष पनि टुङ्गोमा पुग्न सक्ने अवस्था छैन । राजमार्ग  मर्मतको  माग  गर्दै  सङ्घर्षरत  समितिबीच  सरकारी  निकायको  सहमति  भए  पनि यो कार्यको थालनी नै हुन सकेको छैन ।

वातावरण विभाग प्रमुख सरिता राईका अनुसार दिउँसो बाटो मर्मत गर्ने र बिहान २ देखि ८ बजे बीचसम्म फोहोर सिसडोल पुर्‍याउने सहमति भएको थियो तर स्थानीय प्रशासनको र प्रहरीको सहयोग पाउन सकिएको छैन । मजदुरहरूले काभ्रेस्थलीको बाटो प्रयोग गरेका छन् ।

राईका अनुसार यी दुई स्थानीय प्रशासनको  सहयोग  मागिएको  थियो,  अहिले  पनि सहयोग मागिएको छ तर नेपाल प्रहरीका प्रवक्ता  विष्णु  केसीले  फोहोर  व्यवस्थापनका  लागि कतैबाट पनि प्रहरीको सहयोग नमागिएको स्पष्ट  गरे ।

बाटो  मर्मतको  माग  गर्दै  सङ्घर्षरत स्थानीय समितिले माग पूरा नहुञ्जेल सिसडोलमा फोहोर लैजान नदिने गरी राजमार्गमा अवरोध  गरेका  कारण  वैशाख  ११  गतेदेखि  काठमाडौँका सहरका बाटोघाटोमा थुपारिएका  फोहोर  उठाउन  सकिएको  थिएन  ।

काठमाडौँ  महानगरपालिकाबाट सरदर दैनिक ५४५ मेट्रिक टन  फोहोर  सिसडोल  लैजाने  गरिएको  छ  ।  काठमाडौँबाहेक आसपासका महानगर क्षेत्रबाट एक हजार दुई सय मेट्रिक टन अलग्गै फोहोर सिसडोलमा व्यवस्थापन हुँदै आएको छ ।

निजी क्षेत्रका  दुई  सय  र  महानगरपालिकाको  बीस  कन्टेनर दिनहुँ सिसडोलमा फोहोर व्यवस्थापनका लागि पुग्ने गरेका थिए । महानगरपालिका नगर प्रहरी बल प्रमुख धनपति सापकोटाका अनुसार काठमाडौँ   महानगरपालिकाको   प्रशासकीय   अधिकृतको  संयोजकत्वमा  गठित  र्‍यापिड  एक्सन टास्क फोर्स हाल फोहोर व्यवस्थापनमा सक्रिय रहेको छ ।

२०७८  फागुन  २६  गते  प्रधानमन्त्री  तथा  मन्त्रिपरिषद्  कार्यालयले  सहरी  विकास  मन्त्रीको  संयोजकत्वमा  उच्चस्तरीय  समिति  गठन  गरेर  फोहोर  व्यवस्थापनका  विषयमा  अध्ययन  थालेको  थियो  तर  यो  सक्रिय  हुन  सकेको छैन ।

फोहोर व्यवस्थापनमा लागेको बी एन्ड पी क्लिनिङ सर्भिसका इन्चार्ज बुद्व मगरका अनुसार घरघरका फोहोरसम्म उठाएर टेकुमा    व्यवस्थापन    गर्न    सकिएको    छ । टेकुमा पनि फोहोर व्यवस्थापन गर्न सकिने अवस्था   नभएकोले   काभ्रेस्थलीको   बाटो   अपनाइएको हो । गोरखापत्र दैनिकमा सरोज आचार्यले खबर लेखेका छन् ।