यही वैशाख ३० गते हुने स्थानीय तह निर्वाचन आचारसंहिताविपरीत सिन्धुपाल्चोकमा नेकपा  एकीकृत  माओवादी  केन्द्रले  मतदाता  रक्षा दल (भी–फोर्स) गठन गरेको छ ।

एक बुथ २५ युथ अवधारणासहित प्रत्येक पालिका र  वडामा  मतदाता  रक्षा  दल  गठन  गरिएको  माओवादी  केन्द्रका  जिल्ला  अध्यक्ष  गोविन्द  पराजुलीले जानकारी दिए  ।

जिल्लाभर  चार  हजारभन्दा  बढी  भी–फोर्समा युवा सङ्गठित भएका छन् । मतदाताको सुरक्षा गर्ने, मतदातालाई सहजीकरण गर्ने र स्वयंसेवकको भूमिका निर्वाह गर्न मतदाता रक्षा दल गठन गरिएको माओवादी केन्द्रका केन्द्रीय सदस्य  माधवप्रसाद  सापकोटाले  जानकारी  दिए ।

उनले भी–फोर्स केन्द्रीय तहबाट आएको निर्देशन र निर्णय नभई जिल्लाकै निर्णय भएको बताए । युवा  जमात  वाईसीएल  सङ्गठनलाई  सक्रिय   र   गतिशील   बनाउन   भी–फोर्स   गठन गरिएको उनको भनाइ छ ।

निर्वाचन आचारसंहिताले कुनै पनि दलले यस्ता दस्ता निर्माण गर्न रोक लगाएको छ तर माओवादी केन्द्रले  भी–फोर्स  गठन  गरेर  आचारसंहिता  अटेर गरेको छ ।

यस्तै     सिन्धुपाल्चोकमा     नेकपा     एमाले,  नेपाली  काँग्रेस,  एमाओवादी  केन्द्र,  राप्रपा,  समाजवादी  र  अन्य  दलले  निर्वाचन  आचारसंहिता र मापदण्डविपरीत तुल, ब्यानर, भित्तेलेखन,  टिसर्ट,  ज्याकेट,  टोपी,  झन्डा  प्रचारप्रसारमा प्रयोग गरिरहेका छन् । जिल्ला निर्वाचन  अधिकृत  विकास  रिजालले  सबै  दललाई निर्वाचन आचारसंहिताविपरीतका काम तत्काल रोक्न निर्देशन दिएको बताए । गोरखापत्र दैनिकमा चित्र मिजारले खबर लेखेका छन् ।