नीति अनुसन्धान प्रतिष्ठानले बजारमा ल्यायो कोरोनाको अनुभव समेटिएको पुस्तक

नीति अनुसन्धान प्रतिष्ठानले 'कोभिड-१९ सम्बन्धी' पुस्तक बजारमा ल्याएको छ ।

यस पुस्तकमा विभिन्न मुलुकमा कोभिड–१९ महामारीको अवस्था, व्यवस्थापनको अनुभव र सिकाइहरू रहेको प्रतिष्ठानले जनाएको छ ।

विशेष गरी जापान, अमेरिका, चीन, भारत, बङ्गलादेश, दक्षिण कोरिया, फिनल्यान्ड, थाइल्यान्ड, र अस्ट्रियालगायतका देशहरूले कोभिड–१९ को रोकथाम तथा नियन्त्रण गर्न चालेका कदमहरू, कोभिड-१९ सङ्कटमा बेहोर्नु परेको अवस्थामा सम्बन्धित सरकारहरूले लिएका नीतिहरू र भए गरेका अभ्यास र सिकाइहरूका विश्लेषण रहेको पुस्तकमा रहेको छ । 

नीति अनुसन्धान प्रतिष्ठानमा कार्यरत र प्रतिष्ठान भन्दा बाहिरका १८ जना अनुसन्धानकर्ताहरू यस अध्ययनमा संलग्न रहेको प्रतिष्ठानले जनाएको छ ।

नेपालले कोभिड–१९ सङ्कटको शुरूवातदेखि २०७८ भदौ/असोजसम्मको अवधिमा कोभिड-१९ को रोकथाम तथा नियन्त्रणका लागि गरेका प्रयासहरू, अवलम्बन गरेका नीतिगत व्यवस्था र गरेका अभ्यास, कोभिड-१९ कै सन्दर्भमा भएका प्रयासका कारण समग्र स्वास्थ्य क्षेत्रमा देखिएका सुधारलगायतका विषयवस्तुबारे समीक्षा गर्दै विभिन्न विदेशी मुलुकहरूको अभ्यास र नेपालको अभ्यासको तुलना गरिएको छ ।

यसै गरी, नेपालमा स्थानीय तहहरूले अवलम्बन गरेका प्रयासहरू र भूमिका, केन्द्र सरकारसँगको समन्वय र महामारीको रोकथाम तथा नियन्त्रणमा उनीहरूको अनुभव तथा सिकाइहरूको पनि विवेचना रहेको छ ।