प्रतिनिधि सभा : यस्ता छन् आज पेश गरिने विषयहरू

शुक्रवार संघीय संसदका दुवै सदनको छुट्टाछुट्टै बैठक बस्दै छ । 

जसअन्तर्गत प्रतिनिधि सभा बैठक बिहान ११ बजे र राष्ट्रिय सभा बैठक दिउँसो १ बजे बस्ने संघीय संसदका महासचिव डा. भरतराज गौतमले जानकारी दिए । 

बिहान ११ बजे बस्ने प्रतिनिधि बैठकमा विभिन्न प्रस्तावहरू पेश हुँदैछन् । 

नेकपा एमालेका प्रमुख सचेतक एवम् सांसद विशाल भट्टराईले प्रतिनिधि सभामा जरुरी सार्वजनिक महत्वको प्रस्ताव पेश गर्नेछन् । 

पछिल्लो समय बढ्दो महँगी तथा पेट्रोलियम पदार्थको मूल्य र खाना पकाउन प्रयोग गरिने एलपी ग्यासको मूल्यवृद्धि लगायतका विषयमा संसदमा सांसद भट्टराईले जरुरी सार्वजनिक महत्वको प्रस्ताव पेश गर्न लागेका हुन् । 

सांसद यज्ञराज सुनुवार, गणेश कुमार पहाडी र राजेन्द्र प्रसाद लिङदेनले उक्त प्रस्तावको समर्थन गर्ने संघीय संसदको सचिवालयले जनाएको छ । 

यस्तै सोही बैठकमा अर्थमन्त्री जनार्दन शर्माले आगामी आर्थिक वर्ष २०७९/८० को बजेटमाथिको छलफलमा उठेका प्रश्नहरूको जवाफ दिनेछन् । 

यस्तै अर्थमन्त्री शर्माले विनियोजन विधेयक २०७९ प्रस्तुत गर्नेछन् । 

उनले  राष्ट्र ऋण उठाउने विधेयक, २०७९ लाई प्रस्तुत गर्न अनुमति सहित संसदमा प्रस्तुत गर्ने सम्भावित कार्यसूची छ । 

यस्तै ऋण तथा जमानत (पच्चीसौं संशोधन) विधेयक, २०७९ लाई पनि मन्त्री शर्माले प्रस्तुत गर्नेछन् ।

यसैगरी आजको प्रतिनिधि सभा बैठकमा कानून, न्याय तथा संसदीय मामिला मन्त्री गोविन्द प्रसाद शर्मा (कोइराला)ले यौन हिंसा विरुद्धका केही ऐनलाई संशोधन गर्ने विधेयक, २०७९ लाई संसदमा प्रस्तुत गर्ने सम्भावना छ । 

यसका साथमा फौजदारी कसूर तथा फौजदारी कार्यविधि सम्बन्धी केही ऐन संशोधन गर्ने विधेयक, २०७९ लाई पनि संसदमा पेश  गर्ने कार्यसूची रहेको संघीय संसदको सचिवालयले जनाएको छ ।