पेट्रोलको मूल्य बढाएकोमा सांसदको आक्रोश– सरकारलाई सधैं अप्रिलफुल ?

जनतालाई ढाँटेर पेट्रोलियम पदार्थको मूल्य वृद्धि गरिएकोमा नेकपा एमालेकी सांसद विमला विकले सरकारप्रति कटाक्ष गरेकी छिन् ।

‘सात दिन अघि सरकारले भन्यो पेट्रोलमा १० रुपैँया घटायौँ, एक हप्ता नहुँदै हिजो फेरि ८ रुपैँया बढायो । केही दिन सार्वजनिक विदा दिने भन्यो पछि हटायो भन्यो,’ शुक्रबार प्रतिनिधि सभाको बैठकमा सांसद विकले भनिन्, ‘यो सरकारलाई सधै अप्रिल फुल हो ?’ 

सांसद विकले सरकारले मल उपलव्ध नगराएको भन्दै व्यंग्य गरिन् ।

‘किसान मल नपाएर आक्रान्त छन्, न किसानले मल भेटे, न हामीले मन्त्री भेट्यौँ । मल दिन नसकेपनि टाउकोमा मल ल्याउने माथि बहादुरी नदेखाओस् । सरकारलाई नै फाइदा हुने हो, धान बढी फलेछ भने कुशल व्यवस्थापन गरेर धान फल्यो बढ्यो भन्न पाउँछ,’ उनले भनिन् ।