बेलहिया (सुनौली) नाकामा भारतीय भन्सार कार्यालयले ‘सिस्टम अपडेट’ नगर्दा विगत तीन दिनदेखि नेपाल आउने इन्धन बोकेका ट्यांकर नाकामै रोकिएका छन् । 

भारतीय भन्सार कार्यालयले ‘एडी कोड प्रविष्ट’ गरेर मात्रै निर्यात गर्न दिने व्यवस्था अनिवार्य गरेपछि नेपालका लागि ल्याइएका पेट्रोलियम पदार्थ सीमामा रोकिन पुगेका हुन्, जसले गर्दा सुनौली (भारतीय बजार) मा गाडीको ठूलो लाम लागेको हो ।  

भारतीय भन्सारले नै ‘सिस्टम’ अपडेट नगरिदिँदा शनिवारदेखि नेपालमा कुनै पनि पेट्रोलियम ट्यांकर आउन नसकेको नेपाल आयल निगम प्रादेशिक कार्यालय भलवारीका प्रमुख नवविनोद पोखरेलले जानकारी दिए । उनले सम्भवतः सोमवार साँझबाट खुल्ने तयारी रहेको बताए ।

‘भारतीय आयल कर्पोरेशनले एडी कोड राख्नुपर्छ, शुक्रवारदेखि लागू भएको नयाँ व्यवस्थाअनुसार कर्पोरेसनले कोड राख्न ढिला गरेपछि समस्या आएको हो, अब केही समयमा खुल्ने सूचना पाएका छौं,’ पोखरेलले भने । भैरहवा भन्सार हुँदै दैनिक ५० वटा ट्यांकर आउने गरेकोमा शनिवार र आइतवार कुनै पनि नआएको भैरहवा भन्सार कार्यालयले जानकारी दिएको छ ।

भैरहवा भन्सार कार्यालयका सूचना अधिकारी तीर्थराज पासवानले इन्धनका गाडी रोकिएको विषयमा आफूहरू भारतीय पक्षसँग बुझ्न गएको बताए । भन्सार कार्यालय, नेपाल आयल निगम र सरोकारवाला निकायले समन्वय गरिरहेका छन् । बेलहिया नाका हुँदै आउने लोड भएका १०० वटा डिजेल र पेट्रोलका ट्यांकर सीमापारि रोकिएका छन् ।