अर्थमन्त्री जनार्दन शर्माले पूर्वाधार निर्माण देश र राष्ट्रका लागि भन्दा पनि व्यक्तिगत फाइदा हेरेर गर्ने प्रवृत्ति नेपालमा हाबी भएको भन्दै असन्तुष्टि पोखेका छन् । उनले नेपालमा बचत गर्ने संस्कार नहुँदासमेत ठूला पूर्वाधारमा लगानी गर्न स्रोतको अभाव भइरहेको बताए । 

शुक्रवार काठमाडौंमा पूर्वाधार सम्मेलनलाई सम्बोधन गर्दै मन्त्री शर्माले नेपालमा वैदेशिक लगानीको लागि कानून नहुँदा अपेक्षाअनुसार विदेशी लगानी आउन नसकेको बताए । उनले पूर्वाधार विकासको आवश्यकतालाई भन्दा पनि परम्परागत सोचले पूर्वाधार विकास गर्न खोज्दा समस्या रहेको बताए । 

पूर्वाधार विकासमा सरकारका मन्त्री,सरकारी कर्मचारी,लगानीकर्ता र जनताको सोचमा नै समस्या रहेको भन्दै उनले भने, ‘नेपालको पूर्वाधार विकास गर्ने सोचमा समस्या छ । हामीले अहिलेको विकासको आवश्यकतालाई भन्दा पनि परम्परागत रुपले मात्रै सोच्ने विषयमा समस्या छ । सोचबाट नै सरकारका मन्त्री, सरकारी कर्मचारी, लगानीकर्ता र जनताको सोचमा समस्या छ । सबैभन्दा पहिला पूर्वाधार विकास गर्ने सोचलाई बदल्नु पर्छ ।’ 

उनले पूर्वाधारमा लगानीलाई व्यक्तिगत फाइदासँग मात्र जोडिएको बताए ।

‘पूर्वाधार विकास समग्र राष्ट्र, समाज र सबैका लागि भन्दा पनि व्यक्तिगत फाइदाका लागि मात्रै हेर्ने गरेका छौँ । त्यो पनि समस्या देखिएको छ । अब अहिले नेपाललाई कस्ता भौतिक पूर्वाधारहरू आवश्यकता छन् । शिक्षा, स्वास्थ्य, पर्यटन,सञ्चारलगायत विविध क्षेत्रका कुरा गर्छाैं । तर, सरकारको अहिलेसम्म पूर्वाधार विकास गर्ने स्पष्ट नीति छैन । जसको सरकार आयो, जो मन्त्री भयो उसको नीति भन्ने प्रचलन रहेको छ’, उनले भने, ‘कुन–कुन पूर्वाधार आवश्यक हुन् र के-मा लगानी गर्ने समस्या आउँछ । अहिले नेपाललाई कति वटा विमानस्थल आवश्यक हो । भनेर पहिचान गरेर काम गरिरहेको हुन्छ तर अर्को थपिने र घट्ने गर्छ यो राजनीतिक समस्या हुन् । अर्को राज्यको पूर्वाधार विकास गर्ने व्यवस्थापन राम्रो छैन । पूर्वाधार निर्माणको काम समय सम्पन्न नहुने, गुणस्तर नहुने समस्या रहेका छन् ।’