नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्रीकै विषयले गठबन्धनमा समस्या नआउने बताएका छन् । 

चितवनमा मतदान गरेपछि सञ्चारकर्मीसँग कुरा गर्दै उनले भने, ‘प्रधानमन्त्रीकै कारणले गठबन्धन टुट्दैन । जबसम्म संविधान, समृद्धिमा प्रश्न रहन्छ तबसम्म यो गठबन्धन कायमै रहन्छ ।’

आवधिक निर्वाचन समयमा हुनुले संविधान र व्यवस्थाले ठिक ढंगले काम गरेको प्रमाणित भएको प्रचण्डले बताए ।

जित हारको विषयभन्दा पनि समयमा निर्वाचन हुनु नै सबैको जित भएको प्रचण्डको भनाई थियो । ‘कुन पार्टीले कति मत ल्यायो भन्दा पनि ठूलो कुरो निर्वाचन सम्पन्न भएको छ । आवधिक निर्वाचन सम्पन्न हुनु भनेको संविधान र व्यवस्थाले ठिक ढंगले काम गर्दैछ भन्ने कुराको प्रमाण हो’, उनले भने । 

संविधानमाथि प्रश्न उठाउन चाहनेहरू पनि निर्वाचनमा सहभागी हुनु आफैमा ठूलो कुरा भएको उनले बताए ।