अघिल्लोपटक ३० हजार मतान्तर रहेको क्षेत्र एमालेले गुमायो, अन्तिम सीट माओवादीलाई बोनस

२०७४ सालको प्रतिनिधिसभा चुनावमा सर्वाधिक धेरै मतान्तरसहित चुनाव जितेको दोलखा नेकपा एमालेले यसपटक गुमाएको छ । 

यसपटकको चुनावमा ३ सय १७ मतको अन्तरले एमाले उम्मेदवार पराजित भएका छन् । 

२०७४ सालको प्रतिनिधिसभा निर्वाचनमा वामपन्थी गठबन्धनका एमाले उम्मेदवार पार्वत गुरुङले सर्वाधिक मतान्तरसहित चुनाव जितेका थिए । त्यो बेला गुरुङलाई माओवादीको समर्थन थियो । गुरुङले ५५ हजार ४ सय ५७ मत प्राप्त गर्दा कांग्रेसका रुद्रबहादुर खड्काले २४ हजार ८ सय १३ मत पाएका थिए । अन्तर ३० हजार ६ सय ४४ थियो । 

केपी ओलीले सर्वाधिक मत पाए पनि मतान्तरमा गुरुङ अगाडि थिए । २०७४ को त्यो कीर्तिमानी यसपटक एमालेले गुमाएको छ ।

नेकपा माओवादी केन्द्रका ‘लो प्रोफाइल’का नेता गंगा कार्कीले एमाले उम्मेदवार बालकृष्ण सिवाकोटीलाई ४ सयको मतान्तरले पराजित गरे । दोलखा एमालेका पूर्वमन्त्रीद्वय आनन्द पोखरेल र पार्वत गुरुङको जिल्ला हो । 

दोलखामा एमाले र माओवादी दुवैले नयाँ उम्मेदवार उठाएका थिए । एमालेले व्यवसायी बालकृष्ण सिवाकोटीलाई उम्मेदवार बनाएको थियो ।

सोमवार बिहान सार्वजनिक अन्तिम नतिजामा कार्कीले ३६ हजार ७ सय ९९ मत पाउँदा एमालेका सिवाकोटीले ३६ हजार ४ सय ८२ मत पाए । 

त्यतिबेला दोस्रो बढी मतान्तरले जित्ने केपी शर्मा ओलीले यसपटक जीत दोहोर्‍याए पनि तेस्रो बढी मतान्तर रहेका भूमि त्रिपाठी समेत पराजित भएका छन् ।

२०७४ मा धादिङ क्षेत्र नम्बर १ बाट निर्वाचित वाम गठबन्धनका एमाले उम्मेदवार भूमि त्रिपाठीले ४९ हजार १२१ मत पाएका थिए ।

उनका निकटतम् प्रतिद्वन्द्वी कांग्रेसका विश्व अर्यालले २१ हजार ९६८ मत पाउँदा मतान्तर नै २७ हजार १५३ थियो ।

यसपालि त्रिपाठी आफ्नै पूर्व सहकर्मी समेत रहेका सत्ता गठबन्धनका उम्मेदवार (नेकपा एस) राजेन्द्र पाण्डेसँग फराकिलो मतान्तरले पराजित भएका छन् ।

यसपटक पाण्डे ३६ हजार १८ मत ल्याएर विजयी हुँदा त्रिपाठीले २७ हजार ९९७ मत पाएका छन् । उनीहरूबीचको मतान्तर नै ८ हजार २१ छ ।

२०७४ मा एमालेले बढी मतान्तरले जितेका ३ क्षेत्र :

यसपालि (२०७९) को प्रतिनिधि सभा चुनावमा सर्वाधिक मतान्तरको कीर्तिमानी भने राष्ट्रिय स्वतन्त्र पार्टीका रवि लामिछानेले बनाएका छन् । 

नेपाली कांग्रेसका उमेश श्रेष्ठलाई ३४ हजार २ सय १ मतान्तरले रवि विजयी भएका थिए । रविले ४९ हजार ३ सय मत प्राप्त गर्दा उमेशले १५ हजार ९९ मत पाएका थिए । 

सर्वाधिक धेरै मत ल्याउने कीर्तिमानी यसपटक पनि ओलीले बनाएका छन् । ओलीले ५२ हजार ३ सय १९ मत पाउँदा कांग्रेसका खगेन्द्र अधिकारीले २३ हजार ७ सय ४३ मत पाए । 

ओलीपछि धेरै भोट रविले पाए भने सर्वाधिक धेरै मत ल्याउने तेस्रो कीर्तिमानी गोकुल बाँस्कोटाले बनाएका छन् । अघिल्लोपटक धेरै भोट ल्याउनेमा बाँस्कोटा दोस्रोमा थिए । 

माओवादीको खातामा बोनस थपेका कार्कीको जीतसँगै प्रतिनिधि सभाको प्रत्यक्षतर्फको गणना सकिएको छ । 

कार्कीको जितसँगै प्रतिनिधि सभामा एमालेलाई ४४ मा रोक्दै माओवादी केन्द्रले १८ सीट बनाएको छ । अन्तिम नतिजा अनुसार कांग्रेसले ५७, एमालेले ४४ र माओवादीले १८ सीट सुरक्षित गरेका छन् ।

यस्तै नेकपा एसले १०, रास्वपा, राप्रपा र जसपाले समान ७ सीट जितेका छन् । स्वतन्त्रले ५, लोसपाले ४ र नागरिक उन्मुक्तिले ३ सीट जित्दा नेमकिपा, राष्ट्रिय जनमोर्चा र जनमत पार्टीले १–१ सीट जितेका छन् ।

समानुपातिकतर्फको भने अन्तिम परिणाम आउन बाँकी छ ।