अविरल जनसाहित्य यात्राको ७४ औं शृङ्खला सम्पन्न भएको छ । हेटौंडामा रहेर साहित्यमा कलम चलाइरहेका कवि मसान उपासकको एक दर्जन बढी साहित्यिक रचना वाचनसाथ सो शृङ्खला सम्पन्न भएको हो ।

शनिबार राष्ट्रिय जनसांस्कृतिक महासङ्घको सभाकक्ष बागबजारस्थित राष्ट्रिय जनसाहित्यिक सङ्घको सभाकक्षमा आयोजित कार्यक्रममा कवि उपासकको एकल रचना वाचन भएका थिए । 

राष्ट्रिय जनसाहित्यिक सङ्घ, नेपालका अध्यक्ष राम विनयको अध्यक्षतामा सम्पन्न सो कार्यक्रममा राष्ट्रिय जनसांस्कृतिक महासङ्घका अध्यक्ष एवम् सामाजिक रूपान्तरण अभियानका सङ्घर्षशील अभियन्ता प्रेमनाथ अधिकारीको पनि विशेष उपस्थिति थियो ।

कार्यक्रममा युद्धप्रसाद मिश्र स्मृति प्रतिष्ठानका अध्यक्ष डा. फणीन्द्रराज निरौला, प्रा.केशव सुवेदी, राष्ट्रिय जनसांस्कृतिक महासङ्घका केन्द्रीय सचिव एवम् राष्ट्रिय जनसाहित्यिक सङ्घका इन्चार्ज राममणि ढुङ्गेल, प्रगतिशील लेखक सङ्घका उपाध्यक्ष नमुना शर्मा, डा. गोविन्दप्रसाद आचार्य, नर्मदेश्वरी सत्याल, मकवानपुरका स्रष्टा एवम् सामाजिक रूपान्तरण अभियानका अभियन्ता गोपाल सञ्जेल पनि सहभागी थिए ।

कार्यक्रममा अध्यक्ष राम विनयले ६ वर्ष अगाडिदेखि सञ्चालन भइरहेको ‘अविरल जनसाहित्य यात्रा’ महामारीजन्य समयकाबीचमा केही समय रोकिएको भए पनि अन्य समय निरन्तरता पाइरहेको बताए ।

साहित्यमा पनि वर्गीय प्रेम हुन्छ र विनाभेदभाव सबैलाई समान अवसर प्रदान गर्दै सिर्जनामा रहेका कमीकमजोरी सुधार्ने उद्देश्यका साथ वाचित रचनामाथि विशेषज्ञ व्यक्तित्वद्वारा समीक्षा गर्ने प्रचलन रहेको उनले बताए । 

कवि मसान उपासकले सामाजिक रूपान्तरण अभियानलाई सघाउनका लागि आफूले साहित्यिक सिर्जना गरिरहेको बताए । जब जब समाजमा, देशमा देखिएका बेथितिले मलाई दुखाउँछन् तब मैले सिर्जना गर्ने र त्यही सिर्जनामार्फत आपूmलाई अभिव्यक्त गर्ने गरेको छु उनले भने ।

वाचित कवितामाथि डा. रमेश शुभेच्छुकले टिप्पणी गरेका थिए । कवि उपासकको खास नाम मीनप्रसाद सञ्जेल हो । साहित्यमा मसान उपासकका नामबाट निरन्तर नेपाली साहित्यका विविध विधामा कलम चलाइरहेको उनले जानकारी दिए । साहित्यिक सिर्जनामा निरन्तर सक्रिय उपासकका सिर्जना सुन्दर र सशक्त हुनेगरेको उनले बताए ।