नेकपा एकीकृत समाजवादीका अध्यक्ष माधव नेपालले नेकपा एमालेका अध्यक्षलाई अघिल्लो पटक संसद् विघटन गरेको घटना स्मरण गराउँदै आक्रामक रूपले प्रस्तुत भएका छन्। 

संसदमा एमाले अध्यक्ष केपी ओलीले उभिएर संसद् विघटन गर्न पाइन्छ भनेर बोलेकोप्रति उनले आपत्ति जनाएका हुन्। विश्वासको मतको छलफलमा भाग लिँदै नेपालले संवैधानिक अभ्यासमा पछिल्लो संविधानमा धेरै सुधारको काम गरेको भन्दै संसदबाटै विघटन गर्न पाइन्छ भन्दै किन गर्जेको भन्दै ओलीमाथि प्रश्न उठाएका हुन् । 

‘यही रोष्टममा संसद् विघटन गर्न पाइन्छ भनेको सुनेँ । यो मान्यता यो गठबन्धनको हो ? के यो भारत हो ? गिरिजाको जस्तो, पुरानो देउवाको जस्तो सरकार हो ?’ नेपालले भने, ‘हामीले ५ सालमा संविधान बनायौं । १९ सालमा बनायौं । ४७ सालदेखि संविधान निर्माणमा हामी संलग्न छौं । २०६३ र २०७२ को संविधान प्रणालीको सुधारको काम गरेका छौं । हेक्का रहोस् प्रधानमन्त्रीले जथाभावी विघटन गरेर प्रतिगमनको कदम चाल्न पाउँदैनन् ।’

दुईपटक संसद विघटन गरेपछि ओलीले शिक्षा लिएको भन्ने ठाने पनि अझै गर्जन नछोडेकोप्रति पनि उनले आपत्ति जनाए । 

‘प्रतिगमनबाट आत्मआलोचना गरेको होला । शिक्षा लिएको होला भन्ने ठानेको, सुधार पनि भइसकेको होला भनेको त यहाँ गर्जन पो देखियो । यस्तो गोलचक्करमा नफस्नुहोला । आफूखुशी संसद विघटनको अधिकार संविधानले प्रधानमन्त्रीलाई दिएको छैन । सर्वोच्चले व्याख्या गरिसकेको छ । यस्तोमा पनि स्वर ठूलो हाम्रो ?’ नेपालले भने ।