सरकार विस्तारको तयारीमा रहेका प्रधानमन्त्री पुष्पकमल दाहाल 'प्रचण्ड'लाई भेट्न नेकपा एकीकृत समाजवादीका (नेकपा एस) शीर्ष नेताहरू बालुवाटार पुगेका छन् । 

नेकपा एसका अध्यक्ष माधव नेपाल, नेता झलनाथ खनाल, घनश्याम भुसाल र प्रकाश ज्वाला बालुवाटार पुगेका हुन् । 

नेकपा एसले गृह मन्त्रालयमा दाबी गर्दै आएको छ । तर गृह माओवादीले राख्ने भएपछि भौतिक पूर्वाधारसहित तीन मन्त्रालयमा नेकपा एसले दाबी गरिरहेको छ । 

गृहमै दाबी गरिरहेको राष्ट्रिय स्वतन्त्र पार्टीले पनि यो नपाए भौतिक पूर्वाधारमा नै इच्छा गरिरहेको छ । यही बेला प्रधानमन्त्रीलाई दबाब बढाउन नेकपा एसका शीर्ष नेता बालुवाटार पुगेका हुन् । 

प्रधानमन्त्रीले नेकपा एसलाई २ मन्त्रालय दिने गरी प्रस्ताव तयार गरेका छन् । तर उनीहरूको दाबी ३ वटा मन्त्रालयमा रहँदै आएको छ । 

आजै ४ बजे बालुवाटारमा सत्ता गठबन्धनको बैठक पनि बस्दैछ । यही बैठकले सरकार विस्तारलाई टुंगो लगाउने बालुवाटार स्रोतले जनाकारी दिएको छ। 

नेकपा एसले प्रदेश सरकारमा पनि सम्मानजनक हिस्सा पाउनुपर्ने माग गरिरहेको छ।