नेकपा एकीकृत समाजवादीले ३ वटा मन्त्रालयमा आफूहरूको दाबी कायम रहेको जनाएको छ ।

सचिवालय बैठकले ३ वटा मन्त्रालय लिने विषयलाई मुख्य बटमलाइन बनाउने निर्णय गरेको जानकारी प्रवक्ता जगन्नाथ खतिवडाले दिए । 

‘हामीले यसअघि देखि नै सरकारमा ३ वटा मन्त्रालय दाबी गरेका थियौं । यो दाबी अहिले पनि कायम छ,’ बैठकपछि खतिवडाले भने, ‘अब मन्त्रालय टुंगिएर प्रधानमन्त्रीले मागेपछि हामी नाम दिन्छौं ।’ 
यसअघि नेकपा एसले गृह मन्त्रालयमा दाबी गरेको थियो ।

तर यो मन्त्रालय माओवादीले राख्दैछ । माओवादीले छोड्ने भौतिक पूर्वाधार मन्त्रालयमा नेकपा एसले दाबी गरिरहेको छ । 

बैठकअघि नेकपा एसका शीर्ष नेताले प्रधानमन्त्री पुष्पकमल दाहाल प्रचण्डसँग भेटेका थिए । यो भेटमा पनि उनीहरूले ३ वटा मन्त्रालय पाउनुपर्ने विषयलाई बटमलाइन बनाएका थिए ।

तर प्रधानमन्त्रीले ३ वटा मन्त्रालय दिन कोसिस गरे पनि सम्भावना कम रहेको बताएका थिए ।

प्रधानमन्त्रीले यस अघिदेखि नै १० जना सांसद रहेको नेकपा एसलाई २ मन्त्रालय दिने तयारी गरेका छन् ।

नेकपा एसले बेदराम भुसाल र प्रकाश ज्वालालाई मन्त्री बनाउने तयारी गरेको छ । तर मन्त्रीका लागि किसान श्रेष्ठ र भानुभक्त जोशी पनि दाबेदार छन् ।