शरणार्थी प्रकरण: गृहमन्त्री श्रेष्ठलाई बधाई दिन कांग्रेसका युवा नेताहरूको 'डेलिगेसन'

नेपाली नागरिकलाई नक्कली भुटानी शरणार्थी बनाएर ठगी गर्ने गिरोहमा एकपछि अर्को गर्दै प्रभावशाली नेताहरू तानिन थालेपछि राजनीतिक वृत्त तरंगित भएको छ ।

पूर्व गृहमन्त्री एवं कांग्रेस नेता बालकृष्ण खाँण यो ठगी प्रकरणमा समातिएपछि राजनीति वृत्त गर्माएको हो । 

सरकार र उपप्रधान एवं गृहमन्त्री नारायणकाजी श्रेष्ठको अगुवाइमा यो शरणार्थी प्रकरणमा एमाले सचिव टोपबहादुर रायमाझी, सचिव टेकनारायण पाण्डेपछि कांग्रेसका प्रभावशाली नेता एवं गृहमन्त्री खाँण नै तानिएका हुन् । 

खाँणलाई बुधबार पक्राउ गरिएपछि कांग्रेस युवा नेताहरूले 'डेलिगेसन' नै गएर गृहमन्त्रीलाई बधाई दिएका छन् ।

युव नेताहरू गुरुराज घिमिरे, डा. गोविन्दराज पोखरेल, मधु आचार्य, रञ्जित कर्ण र भुपेन्द्रजंग शाहीसहितका नेताले सिंहदरबार पुगेरै ठगीविरुद्ध लाग्ने जोसुकै भए पनि कारवाहीको प्रक्रिया अगाडि बढाउन आग्रह गरेका हुन् । 

नेताविशेष मात्र नभई जघन्य ठगीमा लाग्ने सबैलाई कारवाहीको दायरामा ल्याउन उनीहरूले गृहमन्त्रीको ध्यानाकर्षण गराएका हुन् । 

गृहमन्त्रीले आँट गरेर प्रभावशाली नेताविरुद्ध छानबिन गर्ने र अनुसन्धान अगाडि बढाउने गरी कारवाही अगाडि बढाएपछि कांग्रेसका युवा नेताहरूले गृहमन्त्री श्रेष्ठलाई बधाई दिएका छन् । 

जवाफमा गृहमन्त्री श्रेष्ठले नक्कली शरणार्थी ठगी प्रकरण राज्यविरुद्धकै अपराध भएको भन्दै दोषीले उन्मुक्ति नपाउने बताए ।

‘शरणार्थी प्रकरणमा यो संगठित ठगी मात्रै होइन राजयविरुद्धको अपराध हो । यसतर्फ पनि छानबिन हुन्छ,’ गृहमन्त्रीले भने, ‘दोषी उम्किँदैनन्, निर्दोष फस्दैनन् । गलत काम गर्ने जुन दलका जो नेता भए पनि अनुसन्धानको दायरामा आउँछन् । तर, निर्दोषलाई सामाजिक मर्यादा खराब हुने गरी पक्राउ नगर्न निर्देशन दिइएको छ ।’

गृहमन्त्री श्रेष्ठ यस प्रकरणमा अब कुनै हालतमा पछाडि नहट्ने 'मूड'मा देखिन्छन् ।

'बरु सरकार नै ढले पनि, सडकमै आउनुपरे पनि तयार, तर यस प्रकरणमा पछाडि नफर्किने गृहमन्त्री र वर्तमान सरकारको अडान हो,' गृहमन्त्री श्रेष्ठ निकट स्रोतले लोकान्तरसँग भन्यो ।