गौतम बुद्ध अन्तर्राष्ट्रिय विमानस्थल भैरहवामा 'इन्ट्रुमेन्ट ल्यान्डिङ सिस्टम' (आईएलएस) प्रयोगका लागि भारतले स्वीकृति दिएको छ ।

विमानस्थलमा आईएलएस जडान भए पनि भारतले अनुमति नदिँदा खराब मौसममा उडान तथा अवतरण गर्नै नसकिने अवस्था थियो । जसका कारण महिनौंसम्म अन्तराष्ट्रिय उडान नै ठप्प हुने गरेको छ ।

भारतीय प्रधानमन्त्री नरेन्द्र मोदीसँगको भेटपछि आयोजित संयुक्त पत्रकार सम्मेलनमा प्रधानमन्त्री पुष्पकमल दाहाल 'प्रचण्ड'ले गौतमबुद्ध अन्तर्राष्ट्रिय विमानस्थलमा आईएलएसका लागि भारतले अनुमति दिएको बताएका छन् । 

प्रधानमन्त्री प्रचण्डसँगै दिल्ली यात्रामा रहेका नेपाल नागरिक उड्डयन प्राधिकरणका महानिर्देशक प्रदीप अधिकारीले प्रधानमन्त्रीको भारत भ्रमणका क्रममा हवाई क्षेत्रमा ठूलै प्रगति भएको दाबी लोकान्तरसँग गरे ।

'हामीले आईएलएस जडान गरे पनि भारतले अनुमति नदिँदा खराब मौसममा विमान अन्यत्र डाइभर्ट गर्नुपर्थ्यो,' अधिकारीले लोकान्तरसँग भने, 'अब आईएलएस अनुमति पाएपछि विमान उडान/अवतरण गर्न सहज हुने भयो ।' 

प्रधानमन्त्री प्रचण्डले संयुक्त पत्रकार सम्मेलनमा अतिरिक्त हवाई रुटबारे समेत कुराकानी भएको जानकारी गराए ।

'हामीले अतिरिक्त हवाई रुटका विषयमा पनि छलफल गरेका छौं । द्विपक्षीय हवाई उडानका लागि भारतले दिएको सकारात्मक संकेतलाई नेपालले स्वागत गर्छ,' प्रचण्डले भने ।

उनले दुई देशबीच द्विपक्षीय एटीआर जहाज उडान गर्न सम्भव रहेको पनि बताए ।

'हामीले महेन्द्रनगरबाट 'हाई अल्टिच्युड एयर इन्ट्री रूट'को स्वीकृतिका लागि पनि अनुरोध गरेका छौं,' प्रधानमन्त्री प्रचण्डले थपे, 'नयाँ बनेको पोखरा र भैरहवा अन्तर्राष्ट्रिय विमानस्थलबाट भारतको विभिन्न शहरमा समेत उडान सञ्चालन गर्न चाहेका छौं,' प्रचण्डले भनेका थिए ।
 
प्राधिकरणका महानिर्देशक अधिकारी अब भैरहवा-दिल्ली, नेपालगञ्ज-दिल्लीजस्ता उडान सञ्चालन गर्न पनि सम्भव भएको बताउँछन् ।