संघीय अस्पतालको रूपमा रहेको भरतपुर अस्पतालमा बिरामीको चापअनुसार कर्मचारी नहुँदा व्यवस्थापनमा समस्या हुँदै आएको छ ।

भरतपुर अस्पतालमा अहिले दैनिक १ हजार ५०० हाराहारीमा बिरामी बहिरङ्ग सेवामा आउने गर्दछन् । 

चितवनसहित १२ जिल्लाका बिरामीको उपचार नियमित गर्ने गरेको अस्पतालमा अहिले स्वीकृत दरबन्दी १७७ जनाको छ । अस्पतालमा ४४ चिकित्सकको मात्र स्वीकृत दरबन्दी छ ।

अस्पताल विकास समितिका चिकित्सक र स्वास्थ्यकर्मीको भरमा अस्पताल सञ्चालन हुँदै आएको छ । जहाँ १६५ चिकित्सक कार्यरत रहेका छन् । अस्पतालका मेडिकल सुपरिन्टेन्डेन्ट प्रा.डा. कृष्णप्रसाद पौडेलका अनुसार २ वर्षअघि अस्पतालमा भएको ‘ओएनएम सर्भे’ अनुसार १ हजार ८७ कर्मचारी आवश्यक पर्ने हो । सर्भेअनुसार कर्मचारी नहुँदा अस्पताल विकास समिति र ठेकेदारमार्फत राखिएका कर्मचारीको भरमा अस्पताल चलिरहेको छ ।

विक्रम संवत् २०७५ सालमा अस्पताललाई केन्द्रीय अस्पतालका रूपमा ५०० शय्या बनाउने निर्णय भए पनि अहिलेसम्म कार्यान्वयनमा आउन नसक्दा कर्मचारीको अभावका कारण व्यवस्थापनमा कठिनाइ भएको हो । अहिले अस्पताल ६०० शय्यामा सञ्चालनमा छ ।

अस्पतालमा सरकारी र विकास समिति गरी ९१५ चिकित्सक कर्मचारी कार्यरत रहेका छन् । सरकारले ५०० शय्याको अस्पतालका रूपमा विकास गर्दैगर्दा पनि दरबन्दी भने १५० शय्याको मात्र रहेको छ । पौडेलका अनुसार दैनिक १ जना चिकित्सकले ३० जना बिरामी हेर्नुपर्नेमा ५० देखि १०० जनासम्म बिरामी हेर्नुपर्ने बाध्यता रहेको छ ।

उनले भने, ‘विश्व स्वास्थ्य संगठनका अनुसार १ जना चिकित्सकले ३० जना बिरामी हेर्ने हो तर यो सम्भव छैन ।’

भरतपुर अस्पतालमा बिरामीको विश्वास बढ्दै गएकाले चाप दैनिक बढेको उनले जानकारी दिए । कोभिड संक्रमणको समयमा भन्दा पछिल्ला वर्षमा बिरामीको चाप बढ्दै गएको पौडेलले बताए । उनका अनुसार स्वास्थ्य बीमा कार्यक्रममा अस्पतालमा लागू हुनु, अस्पतालप्रति विश्वास बढ्दै जानु र अस्पतालमा दिइने सेवालाई विशिष्टकृत गर्दै जाँदा बिरामीको चाप बढ्दै गएको हो ।

अस्पताका सूचना अधिकारी गोपाल पौडेलका अनुसार अस्पतालमा शय्या बढेको, सघन उपचार कक्ष थप गर्नु, बाल सघन उपचारकक्ष (पीआईसीयू) सञ्चालनमा आउनु, अस्पतालका भौतिक संरचनासँगै अत्याधुनिक प्रविधिबाट उपचार हुनुले अस्पतालप्रति बिरामीको आकर्षण बढेको हो । बिरामीको चाप बढेसँगै अहिले अस्पतालमा मिर्गौलाको डायलायसिस उपकरण थप गरी २० वटा सञ्चालन गर्ने तयारीमा अस्पताल रहेको छ भने ६ वटा थप गर्न लागिएको हो ।

आधुनिक शल्यक्रिया कक्ष, आकस्मिक कक्षका लागि छुट्टै टिकट काउन्टर, विशेषज्ञ सेवाका लागि जीओपीडी, बहिरङ्ग सेवाको टिकट काट्ने काउन्टर थपसँगै उपचार समय पनि थप गरिनु, विशेषज्ञ सेवा नियमित हुनुले अस्पतालमा बिरामीको चाप बढेको उनले बताए ।

बिरामीको चाप अनुसारको व्यवस्थापनका लागि अस्पताल प्रशासन लागिपरेको उनको भनाइ छ ।

प्रसूति सेवाका लागि राजधानी बाहिरको उत्कृष्ट अस्पतालका रूपमा भरतपुर अस्पताल चिनिन्छ । जिल्लामा प्रसूतिको पहिलो रोजाइ भरतपुर अस्पताल बनेको छ ।