भोजपुर पूर्णखोप सुनिश्चितता तथा दीगोपना जिल्ला घोषणा भएको छ । 

राष्ट्रिय खोप तालिकाअनुसार जन्मदेखि १५ महिनासम्म र १६ महिनादेखि ५ वर्षमुनिका बालबालिकाले खोप पाएको निश्चित भएसँगै पूर्णखोप सुनिश्चितता तथा दीगोपना जिल्ला घोषणा भएको हो ।

भोजपुरका ९ स्थानीय तहलाई पूर्णखोप सुनिश्चितता तथा दीगोपना घोषणा गरिसकेपछि सोमवार औपचारिक रूपमा पूर्ण खोप सुनिश्चितता तथा दीगोपना जिल्ला घोषणा गरिएको छ । सरकारबाट निःशुल्क दिइने सबै प्रकारका (१३ किसिम) खोप लगाएपछि जिल्लालाई पूर्ण खोप सुनिश्चितता तथा दीगोपना जिल्ला घोषणा गरिएको स्वास्थ्य कार्यालय भोजपुरका प्रमुख सुमन तिवारीले जानकारी दिए ।

‘निर्धारित उमेर समूहका बालबालिकाले सम्पूर्ण खोप लगाएसँगै भोजपुरलाई पूर्ण खोप सुनिश्चितता तथा दीगोपना जिल्ला घोषणा गरेको छौं,’ उनले भने, ‘यो अभियान जारी रहन्छ । सबै स्थानीय तहलाई यसअघि नै घोषणा गरेर आज जिल्ला घोषणा गर्न सफल भएका हौं ।’

यो घोषणासँगै भोजपुर कोशी प्रदेशमा पूर्ण खोप सुनिश्चितता तथा दीगोपना घोषणा हुने चौथो जिल्ला बनेको स्वास्थ्य कार्यालयले जनाएको छ । आगामी दिनमा बालबालिकालाई सरकारले उपलब्ध गराउने सबै प्रकारका खोपको मात्रा पूरा गराउन सबैले भूमिका खेल्नुपर्ने कार्यक्रमका सहभागीले बताएका छन् ।

जिल्ला खोप समन्वय समितिका संयोजक तथा जिल्ला समन्वय समिति भोजपुरका प्रमुख कमल थुलुङले पूर्ण खोप सुनिश्चितता तथा दीगोपना जिल्ला घोषणा गरेका हुन् । सो अवसरमा जिल्लाका ९ वटै स्थानीय तहलाई सम्मान समेत गरिएको छ ।