त्रिभुवन विश्वविद्यालय शिक्षण अस्पताल महाराजगञ्जमा दैनिक करीब २ हजार ७०० बिरामीले सेवा लिँदै आएका छन् ।
त्रिवि चिकित्साशास्त्र अध्ययन संस्थानको ५१औं वार्षिकोत्सवका अवसरमा अस्पतालका कार्यकारी निर्देशक प्रा.डा. दिनेश काफ्लेले विभिन्न विधामा दैनिक २ हजार बढी बिरामीले बहिरङ्ग सेवा प्राप्त गरिरहेको जानकारी दिए ।

उनका अनुसार बिरामीले अनावश्यक दुःख झेल्न नपरोस् र अस्पतालको सेवालाई थप व्यवस्थित गर्न सकियोस् भनी धेरै भीडभाड हुने नाक, कान, घाँटी, बाथरोग, हाडजोर्नी उपचारसँग सम्बन्धित विभागमा टोकन प्रणाली लागू गरिएको छ । 

त्रिवि शिक्षण अस्पतालमा विभिन्न विधाका ३६ वटा विभागमा करीब २ हजार २०० जनशक्ति कार्यरत रहेको जानकारी दिँदै उनले त्रिवि शिक्षण अस्पताल हाताभित्र रहेका बीपी कोइराला आँखा उपचार केन्द्र र मनमोहन कार्डियो भास्कुलर ट्रास्प्लान्ट सेन्टर भने अलग्गै रहेको स्पष्ट गरे ।

कार्यकारी निर्देशक काफ्लेका अनुसार स्थापनाकालमा ३०१ शय्या रहेको अस्पतालमा अहिले ८०१ शय्या छन् । काफ्लेले छोटो समयका लागि थप २०० शय्या समेत गरी एकैपटक १ हजार बिरामी अस्पतालमा भर्ना गरी उपचार गर्न सकिने व्यवस्था रहेको छ । त्रिवि शिक्षण अस्पतालका बिरामी खचाखच हुने गरेकाले अधिक चाप परेको समयमा अस्पतालमा वैकल्पिक व्यवस्था गरी बिरामीको उपचार व्यवस्था मिलाउने गरेको उनले जानकारी दिए ।

कार्यकारी निर्देशक काफ्लेले अस्पतालमा करीब २०० फ्याकल्टी डाक्टर र ९०० नर्सिङ स्टाफसहित अन्य आवश्यकीय जनशक्ति विभिन्न सिफ्टमा खटिएर अहोरात्र सेवा प्रदान गरिहेको जानकारी दिए । उनले सर्वसुलभ एवं गुणस्तरीय सेवा प्रदान गरी आमजनतालाई विश्वसनीय स्वास्थ्य सेवा प्रदान गर्ने एकमात्र लक्ष्य रहेको अस्पताललाई समाजका सबै क्षेत्रबाट साथ, सहयोग आवश्यक रहेको बताए ।

विभिन्न तह र पदका गरी करीब ६०० दरबन्दीको आर्थिक दायित्व सरकारले व्यहोर्ने भएकाले बाँकी जनशक्तिका सेवासुविधा भने अस्पताल आफैंले व्यवस्था गर्नुपर्ने समेत उनले जानकारी दिए ।