प्रमुख प्रतिपक्षी दल नेकपा एमालेका अध्यक्ष केपी शर्मा ओलीले राष्ट्रपतिले संविधानमा नभएको सक्रियता देखाउन खोजेको भन्दै आपत्ति जनाएका छन् । ​उनले मंगलवार बिहानका लागि राष्ट्रपति रामचन्द्र पौडेलले बोलाएको सर्वदलीय बैठकप्रति आपत्ति जनाएका हुन् ।

सोमवार रातिको सर्वदलीय बैठकमा ओलीले प्रधानमन्त्री प्रचण्डसँग राष्ट्रपतिलाई गैर संवैधानिक बैठक बोलाउन कसले उक्सायो ? भन्दै प्रश्न गरेका थिए । ‘प्रधानमन्त्रीजीलाई मेरो प्रश्न छ, राष्ट्रपतिलाई गैर संवैधानिक बैठक बोलाउन कसले लगायो ? कसले उक्सायो ?’ ओलीको भनाइ उद्धृत गर्दै एमाले स्रोतले भन्यो । 

ओलीले राष्ट्रपतिले बोलाएको औचित्यहीन बैठकमा सहभागी नहुनेसमेत चेतावनी दिएका थिए ।

संसद् गतिरोध अन्त्यका लागि भन्दै राष्ट्रपति रामचन्द्र पौडेलले मंगलवार बिहानका लागि सर्वदलीय बैठक आह्वान गरेका छन् । ‘प्रधानमन्त्रीको परामर्शबिना राष्ट्रपतिले यस्तो बैठक बोलाउने व्यवस्था कहाँ छ ? प्रधानमन्त्रीजी हामी सहमति जुटाउन सक्दैनौं भनेर बोलाएको हो ?’ ओलीले प्रधानमन्त्रीसँग प्रश्न गरेका थिए । 

जवाफमा प्रचण्डले सर्वदलीय बैठक बोलाउन आफूले कुनै सल्लाह नदिएको स्पष्टीकरण दिएका थिए । कांग्रेस नेताहरूले भने राष्ट्रपतिको सदासयताप्रति प्रश्न उठाउन नमिल्ने बताएका थिए । प्रधानमन्त्री प्रचण्ड, विपक्षी दलका नेता ओली, सभामुख र राष्ट्रिय सभाका अध्यक्षसमेतसँग छलफल गरेपछि पौडेलले सर्वदलीय बैठक बोलाएका थिए ।

सोमवार अबेर रातिसम्म बसेको बैठकमा त्रिभुवन अन्तर्राष्ट्रिय विमानस्थल भन्सार बाहिरबाट समातिएको सुन सम्बन्धमा छानबिनका लागि उच्चस्तरीय आयोग गठन गर्नेबारे दलहरू सहमति नजिक पुगेका छन् । प्रहरीको केन्द्रीय अनुसन्धान ब्युरो (सीआइबी)ले गरिरहेको अनुसन्धान टुंग्याएपछि त्यस्तो आयोग गठन गर्न सत्तापक्ष तयार भएको छ ।

बैठकमा सहभागी जसपा नेता राजकिशोर यादवका अनुसार उच्चस्तरीय आयोग सम्बन्धमा गृहकार्य गर्न नेकपा एमाले संसदीय दलका उपनेता सुवास नेम्वाङ, कांग्रेस संसदीय दलका प्रमुख सचेतक रमेश लेखक र माओवादीका हितराज पाण्डे सहितको कार्यदल गठन गरिएको छ । 

कार्यदलको बैठक मगलवार दिउँसो १ बजेका लागि बोलाइएको छ । उच्चस्तरीय आयोग गठनमा सत्तापक्ष लचिलो भएपछि एक महिनादेखिको संसद् अवरोध हटाउन एमाले तयार भएको छ ।