बाँकेको शम्सेरगन्जमा भएको बस दुर्घटनामा ज्यान गुमाउने सातमध्ये ६ जनाको सनाखत भएको छ । इलाका प्रहरी कार्यालय कोहलपुरका अनुसार दुर्घटनामा एउटै वडाका ५ जनासहित ७ जनाको मृत्यु भएको छ । 

दाङको भ्रमण सकेर बर्दियातर्फ जाँदै गरेको ना ७ ख २३२१ नम्बरको बसले गएराति सडकमा रोकिराखेको ना ८ ख ६४०५ नम्बरको ट्रकलाई राप्ती सोनारी गाउँपालिका वडा नम्बर ८ स्थित शम्सेरगञ्जमा ठक्कर दिएको थियो ।

दुर्घटनामा ज्यान गुमाउनेमा बर्दिया ठाकुरबाबा नगरपालिका वडा नम्बर–९ का ५० वर्षीय काशिराम थारू, सोही वडाकै ५५ वर्षीया कस्तुरी थापा, सोही ठाउँकै ५० वर्षीया रूपा परियार, ४० वर्षीया जयन्ती थारु र ६५ वर्षीय साधुराम थारू रहेका छन् । 

यसैगरी दुर्घटनामा ठाकुरबाबा नगरपालिका–८ का बस चालक ४५ वर्षीय जुगबहादुर चन्द र नाम खुल्न बाँकी सहचालक ३५ वर्षीय युवकको ज्यान गएको इलाका प्रहरी कार्यालय कोहलपुरका डीएसपी सुन्दर तिवारीले लोकान्तरलाई जानकारी दिए । 

बर्दियाको बेतनी सामुदायिक वन उपभोक्ता समितिका सदस्यहरू बस रिजर्भ गरेर दाङको चखौरास्थित थारू संग्रहालयको भ्रमण गरी फर्किने क्रममा दुर्घटनामा भएको हो । 

पूर्वबाट पश्चिमतर्फ जाँदै गरेको ट्रक बाटोमा बिग्रिएर राखिएको थियो,’ डीएसपी तिवारीले भने, ‘तीव्र गतिका गाडी त्यही ट्रकमा ठोक्किएर दुर्घटना भएको छ । गाडीभित्र धेरै नाचगान गर्दै रमाइलो गरेका थिए । दुर्घटना कसरी हुन पुग्यो भनेर घाइतेलाई सोध्दा पनि एक्कासि ट्रकमा ठोकिन पुगेको बताएका छन् ।’ 

गाडीमा ४१ जना सवार थिए । जसमा ९ जना सामान्य घाइते भएका छन् । जसमध्ये २ जना अस्पतालबाट डिस्चार्ज भइसकेको उनले बताए । अन्य ४ जनाको टाउकोमा चोट लागेको छ ।