यही मंसिर २९ गतेबाट प्रदर्शनमा आउने चलचित्र ‘दुई कदम’को ट्रेलर सार्वजनिक गरिएको छ । 

निर्माण पक्षले बुधवार राजधानीमा एक कार्यक्रमको आयोजना गर्दै ओएसआर डिजिटलको युट्युबमार्फत ट्रेलर सार्वजनिक गरेको हो ।

उदय सुब्बा निर्देशित चलचित्रको ट्रेलरमा यात्राका क्रममा नजिकिएका एक जोडीको प्रेम र त्यसमा आउने उचारचढावलाई देखाइएको छ । प्रेम, रोमान्ससँगै कमेडी, द्धन्द्ध र कल्चरको प्याकेज ट्रेलरमा देख्न सकिन्छ । 

यो चलचित्रमा इओन लिम्बु, सिमोन गिरी, गौरव पहारी, सुनील थापा, प्रेम सुब्बा, कविता आले, बुद्धि तामाङ, अर्जुन गुरुङ, विमला लिम्बु, जिवन लिम्बु, चन्दा दाहाल, प्रितिका शर्मा लगायतका कलाकारहरूको अभिनय छ । जसमध्ये शीर्ष भूमिकामा रहेका इओन र सिमोनको यो डेब्यु चलचित्र हो । 

चलचित्रको एक गीतमा अभिनेत्री वर्षा शिवाकोटीको नृत्य समेत दर्शकले हेर्न पाउनेछन् । ​

अजम्बरी फिल्मस्को प्रा.लीको प्रस्तुति रहेको चलचित्रमा तारा देवी लिम्बुको लगानी छ ।

दयाराम घिमिरेको कथा तथा पटकथा लेखन, विक्रम डिसीको छायांकन, ताराप्रकाश लिम्बु र विकास चौधरीको संगीत रहेको चलचित्रमा डिपी खनालको गीत लेखन, राजु किराँतको द्वन्द्व निर्देशन, रामजी लामिछानेको कोरियोग्राफी र प्रविन दाहालको सम्पादन छ । 

चलचित्रका गीतमा आशिष अविरल, प्रताप दास, मेलिना राई, प्रविशा अधिकारी, सिडी विजय अधिकारी, निरुषा भट्टराई लगायतको स्वर छ । चलचित्रलाई रिच इन्टरटेनमेन्ट र एफडी कम्पनीले वितरण गर्दैछन् ।

फिल्म ‘दुई कदम’का जोडी भन्छन् : ‘रियल लाइफ’सँग मिल्दोजुल्दो भूमिकामा छौँ