रुसी प्रधानमन्त्री मिखाइल मिशुस्टिनले मङ्गलबार चीनसँगको आफ्नो मुलुकको सम्बन्धको प्रशंसा गरेका छन् । उनले चीनको राजधानी बेइजिङको भ्रमणका क्रममा द्विपक्षीय सम्बन्धमा ‘सर्वकालीन उचाइ’ को घोषणा गरे । 

चीन र रुसले हालैका वर्षहरूमा आर्थिक र कूटनीतिक सहयोगलाई बढाएका छन् । मस्कोले युक्रेनमाथि आक्रमण गरेपछि दुवै मुलुकबीचको सम्बन्ध घनिष्ठ भएको छ । यद्यपि बेइजिङ उक्त युद्धमा तटस्थ रहेको छ । चिनियाँ सरकारी प्रसारक सिसिटिभी र क्रेमलिनका अनुसार प्रधानमन्त्री मिशुस्टिनले आफ्ना चिनियाँ समकक्षी ली कियाङसँग भने, “रुस–चीन सम्बन्ध अहिलेसम्मकै उच्चतम स्तरमा छ ।”

“राष्ट्रपति सी जिनपिङ र राष्ट्रपति भ्लादिमिर पुटिनको रणनीतिक निर्देशनमा चीन–रुस सम्बन्ध उच्चस्तरमा सञ्चालन भइरहेको छ”, सिसिटिभीका अनुसार चिनियाँ प्रधानमन्त्री लीले मिशुस्टिनसँग भने, “अनन्तकालसम्म चल्ने मित्रतालाई अगाडि बढाउन तथा विश्वमा थप स्थिरता र सकारात्मक ऊर्जा ल्याउन प्रयास गर्नेछौँ ।”

    रुसी राष्ट्रपति पुटिनले आफ्ना चिनियाँ समकक्षी सीलाई भेट्न रुसबाहिर एउटा दुर्लभ भ्रमण गरेको र मस्कोमा वरिष्ठ चिनियाँ जनरललाई आतिथ्यता प्रदान गरिएपछि मिशुस्टिन मङ्गलबार र बुधबार चीनको भ्रमणमा छन् ।