मुलुकको ठूलो र पुरानो त्रिभुवन विश्वविद्यालयले यही फागुन १४ गते स्वतन्त्र विद्यार्थी युनियनको निर्वाचन गर्ने घोषणा गरेसँगै ‘विद्यार्थी बजार’ तातेको ।
सामाजिक सञ्जालमा स्ववियु निर्वाचनक सम्बन्धमा व्यापक वहस भइरहेको देखिन्छ । स्ववियु चुनावले मात्र गरमागरम बहस निम्त्याउने पक्कै थिएन । यो केवल कर्मकाण्डको रूपमा विकसित छ भएकाले पनि यसको बढी चर्चा भएको हुनुपर्छ । यद्यपि यसपाली चुनावी उम्मेदवारको उमेरमा ‘हदबन्दी’ लगाउने घोषणा गरेपछि कतिपयको ‘पारो’ तातेको देखिन्छ । २८ वर्षे उमेरको हदबन्दीले २८ वर्ष उमेरभन्दा बढी उमेरका विद्यार्थीहरू स्वतः उम्मेदवार हुनका लागि अयोग्य हुनेछन् ।
केही तथ्यहरू हेरौं :
१. नेपालको आधुनिक शिक्षाप्रणालीमा प्रायः १५/१६ वर्ष प्रवेशिका तह, १८/१९ वर्ष प्रमाणपत्र तह, २३/२४ वर्ष स्नातक तह र २६/२७ वर्षमा सरसर्ती हेर्दा स्नातकोत्तर उपाधि हासिल हुने देखिन्छ । एउटा उदाहरणका रुपमा आफ्नै अध्ययन अवधीको व्याख्या गर्न चाहन्छु । म १९८८ डिसेम्बरमा जन्मेको हुँ । आफ्नै हेर्ने हो भने सन् २००४ मा प्रवेशिका , सन् २००७ मा डिप्लोमा, २०१४ मा बिई, २०१६ मा मास्टर डिग्रीको उपाधि प्राप्त भयो । जहाँ मैले प्रवेशिकापछि तीनवर्षे कोर्स पढेँ त्यसको सट्टामा प्लस टुसरह पढेको भए दुई वर्षमा सकिन्थ्यो । त्यसपछि दुई वर्ष काममा लागें र त्यसपछि पढें चार वर्षे कोर्स । मैले सरासर पढेको भए सन् २०११ मा स्नातक सकिन्थ्यो र स्नातकोत्तर २०१४ भित्रै । अझै प्लस टु र तीनवर्षे ब्याचलर गर्दा झन् छिटो सकिन्छ । यसरी हेर्दा मध्यमस्तरमा २००४ देखि २०१६ गर्दा १२ वर्षमा विश्वविद्यालयको स्नातकोत्तर पढाइ सकिने रहेछ ।
अलिक द्रुतमार्गमा पढ्नेहरूले यति वर्ष भित्रमा सजिलैसँग विश्वविद्यालयको स्नातकोत्तर पढाइ सम्पन्न गरेको ‘रेकर्ड’ प्रशस्त छन् । अब उमेरमा हेर्नुभयो भने द्रुतमार्गबाट (१६ जोड १० गर्दा २६ वर्षभित्र) र मध्यम गतिमा (अलिअलि जाममा पर्दै अगाडि बढ्ने मार्गबाट १६ जोड १२ गर्दा २८ वर्षमा) स्नातकोत्तर पढाइ सकिने देखिन्छ ।
२. एमफिल र पिएचडी पढ्ने उमेर समूह खोइ ? उनीहरूले के चुनाव लड्न नपाउने ? त्यस तहमा पढ्नेहरूलाई उमेरको हदबन्दी गर्न मिल्छ र उम्मेदवार हुनका लागि ? भन्ने प्रश्न आउन सक्छ । तर जानेबुझे अनुसार त्यो तप्का र तह नेपालको विद्यार्थी राजनीतिको दैनन्दिनको गतिविधिमा त्यति सौखिन छैन । समयको सुविधा पनि उनीहरूलाई हँुदैन । यदि त्यो तहको नेतृत्व आउने हो भने बहस स्वतः परिमार्जित हुनेछ र विद्यमान व्यवस्था खारेज गर्नुको विकल्प हुनेछैन । यद्यपि यो सम्भावना न्यून छ ।
३. ‘रिपीट डिग्री’ वालाहरूको कथा यसमा जोड्नु आवश्यक छ । नेपालमा सबैभन्दा धेरै विषयमा स्नातकोत्तर उपाधि डिग्री लिने, भर्ना भइरहने, चुनावका लागि मात्र पढेको देखाउने चलन लुकेछिपेको विषय होइन । तर साँच्चिकै भिन्न–भिन्न विषयमा अब्बल तरिकाले उपाधि लिने विद्यार्थी र विज्ञसमूह पनि छ । तर त्यो समूह यसमा आकर्षित छ कि छैन ? विज्ञताको लागि गरेको अध्ययन र त्यसको प्रयोग गर्ने ठाउँहरू प्रशस्त छन् र यो समूहमा प्रथम स्नातकोत्तर उपाधिसम्मको समय छँदैछ ।
४. अर्गनाइजेसन फर इकोनोमिक कोअपरेसन एन्ड डेभेलपमेन्ट (ओईसीडी) मा आबद्ध ३५ मुलुकको सन् २०१४ मा प्रकाशित एक रिपोर्टका अनुसार २४ वर्ष उमेरलाई फस्ट ग्य्राजुएसनको ‘औसत उमेर’ देखाएको छ । अझै त्यहाँ २२ वर्षदेखि नै फर्स्ट ग्य्राजुएसन गर्ने उमेरका विद्यार्थीको तथ्यांक उच्च नै छ । २२ देखि २७ वर्ष फस्ट ग्य्राजुएसन उमेर रहेको तथ्यांकले देखाएको छ । यो आधारलाई लिने हो भने पनि आलेख को एक नम्बरमा दिएको उदाहरण मिल्दोजुल्दो देखिन्छ ।
विद्यार्थी राजनीतिको एउटा मुख्य पाटोका रूपमा स्वतन्त्र विद्यार्थी युनियनको चुनाव रहँदै आएको थियो । पछिल्लोपटक २०६५ मा त्रिविले स्ववियु चुनाव गराएपछि आजसम्म अर्को चुनाव भएको छैन । यद्यपि दुई वर्षमा आवधिक चुनाव गराइरहनु पर्ने थियो । स्थानीय निकायको निर्वाचन गर्ने मनसाय र हिम्मत नभएका विगतका सरकार र राजनीतिक पार्टीहरूले स्ववियु चुनावलाई ध्यान दिएनन् भनेर गुनासो गर्दा महत्वाकांक्षी बनिएला भन्ने डर छँदैछ । विद्यार्थी संगठनहरूको कुरै नगरौं अझै आफैं सम्बद्ध नेविसंघको इतिवृत्तान्त जगजाहेर नै छ ।
स्ववियु चुनाव यो मितिमा अनिवार्य हुनुपर्छ । यो वा त्यो बहानामा यसलाई रोक्नु मनासिब देखिन्न । स्ववियु चाहिएको छ भने उमेरको बहानामा रोकिनु तर्कसंगत देखिँदैन । अनिवार्य र यही मितिमा निर्वाचन सम्पन्न गर्न नेविसंघले अगुवाइ गर्नुपर्छ । नेविसंघ स्वयंले ३२ वर्षे उमेरको हदबन्दी पारित गरिसकेको सन्दर्भमा त्रिविको पछिल्लो निर्णयलाई स्वीकार गर्न एक कदम अगाडि बढ्नु जरूरी छ ।
उमेर केवल पार गरेका वर्षहरूसँग मात्र जोडिने विषय होइन । उमेरले आफ्नो पछाडि ‘ब्यागेज’ बोकेको हुन्छ तसर्थ उमेर जहाँ पनि बहसको विषय हो । योग्यताको विषय सापेक्षिक हो । सन्दर्भ सन्दर्भमा पेचिलो विषय हो । जैविक विषय हो । उमेर अनुभव हो । उमेर मनोविज्ञान हो । उमेर जोशको, होशको, ज्ञानको र ध्यानको विषय हो । उमेर बहुआयामिक तत्व हो ।
उमेरलाई योग्यताको कसीमा राखिएका प्रशस्त दस्तावेजहरू छन् । नेपालको संविधानमा उमेरलाई योग्यताको कसीमा राखिएका धेरै दफा छन् । मतदान गर्ने सबै उम्मेदवारीका लागि योग्य हुन्छन् भन्ने हुँदैन । कहीँ त्यस्तो छैन र त्यस्तो हुनु पनि हँुदैन । संसारमा ‘क्राइटेरिया’ हरेक सन्दर्भमा तोकिएको हुन्छ । ‘क्राइटेरिया’ मा नपर्ने उम्मेदवार स्वतः अयोग्य हो । हुनुपर्छ । नियुक्तिमा, भर्नामा, अवकाशमा, छात्रवृत्तिमा सन्दर्भ हेरिकन उमेर तोकिएको हामी सबैसामु छर्लंग छ । तसर्थ उमेर ‘अवसर’ पनि हो र ‘अवरोध’ पनि हो ।
एउटा विषय यो पनि हुनसक्छ कि लामो समयदेखि चुनाव नभएको कारणले संक्रमणकालीन परिस्थितिको व्याख्या गरी एकपटकको लागि कुनै हदबन्दी नराखी पुरानै तरिकाले चुनावमा जानुपर्छ । तर यदि यस्तो हो भने यो निर्णय नहुँदै चुनाव सम्पन्न गर्न के कारणले अवरोध भएको थियो ? किन निर्वाचन गरिएन ? त्यसको दोषी को ? यी प्रश्नहरूको निष्कर्षपछि मात्र यो विषय पेचिलो होला, होइन भने यो विषय फेरि पनि चुनाव नहुने बाटोतर्फ लैजाने सेतु मात्र हुन जानेछ ।
स्ववियु चुनाव, यसका परिणाम, यसको इतिहास, यसका विगतका उपलब्धि र कमीकमजोरीबारे ‘गहिरो अनुसन्धान’ नेपालमा भएको छैन । स्ववियु चुनाव आवश्यक हुनुको अपरिहार्यताबारे विद्यार्थी संगठनका नेताले बोल्नु र लेख्नु जरूरी छ । स्ववियु चुनाव विद्यार्थीका लागि हो भने निश्चित उमेर समूहको विद्यार्थी नै त्यसका लागि हकदार छन् । यो ‘लिमिट’ को कारणले पर्न गएको असरको जिम्मा सम्बन्धित संगठनले लिनुपर्छ र उचित तथा आवश्यक जिम्मेवारी दिनुपर्छ ।
राजनीति गर्न र नेतृत्व क्षमता विकास गर्न यो व्यवस्थाले नसमेटेका साथीहरूलाई अन्य धेरै अवसर छन्, अवसर आउँछन् । २८ वर्षमुनिका नेता आएपनि संगठनकै साथीहरू नेतृत्वमा आउने हुन् भन्ने चौडा छातीको आवश्यकता छ ।
हुन त आफू सम्बद्ध संस्थाका अध्यक्ष नैनसिंह महर नै २८ वर्षे उमेरहद भन्दा झन्डै डेढ दशक बढी उमेरको हुनुभएको आँकलन गरिएको बेला उमेरहदले तताएको ‘पारो’ लाई अन्यथा मान्न सकिन्न । समस्याहरू छैनन् भन्ने होइन, तर समधान चाहिएको सत्य हो । समाधान तोकिएको समयमा नै स्ववियु निर्वाचन हुनु हो ।
डिसेम्बर पहिलो साता एनसेलको माउ कम्पनी आजियाटाले आफ्नो रेनोल्ड होल्डिङ्स यूकेको शतप्रतिशत स्वामित्व गैरआवासीय नेपाली सतिशलाल आचार्यको कम्पनी स्पेक्ट्रलाइट यूकेलाई बेच्न गरेको सम्झौताबारे समाचार बाहिरिएको झन्डै ३ हप्...
कमेडी क्लब चलाउने मुन्द्रे उपनाम गरेका एकजना मान्छे छन्। एकै श्वासमा चारवटा प्रश्न सोध्न सक्ने क्षमता भएका जानेमाने पत्रकार ऋषि धमलाको कार्यक्रममा पुगेर तिनले भन्न भ्याए, 'यो टिकटकका कारण मान्छेहरू अल्छी भए, कुन...
उमेरले ३५ वर्ष पुग्नै लाग्दा मैले लोकसेवा आयोगको फाराम भरें । ३५ वर्ष कटेको भए फाराम भर्न पाउँदैनथें, तर नियुक्ति लिँदा भने ३५ वर्ष कटिसकेको थिएँ । लोकसेवा आयोगको सिफारिशअनुसार क्षेत्रीय सिञ्चाइ निर्देशनालयले...
आज ‘सबैका लागि मर्यादित जीवन’ को आदर्श वाक्यसाथ अन्तर्राष्ट्रिय गरिबी निवारण दिवस मनाइँदै छ । भोक, रोग, अभाव र आवश्यकता पूरा भएपछि मात्र मानवीय मर्यादा पाउन सकिन्छ । नेपालमा गरिबी र असमानताका विभि...
धरान उपमहानगरपालिकाका मेयर हर्क साम्पाङले राष्ट्रपति र प्रधानमन्त्रीको फोटो नगरपालिकाबाट हटाएको विषय अहिले निकै चर्चामा छ । २०५४ मा त्यही प्रकृतिको क्रियाकलाप गरेका थिए, लीला थापा मगरले । जिल्ला विकास समिति...
गरिबको घरआँगन कसैलाई मन पर्दैन । गरिबको लुगाफाटो कसैलाई मन पर्दैन । गरिबले ठूला कुरा गरेको कसैलाई मन पर्दैन । गरिब नाचेको, गरिब हाँसेको कसैलाई मन पर्दैन । यतिखेर गरिबले लडेको जनयुद्ध दिवस पनि कसैलाई मन ...
मानव स्वभाव प्रायः म र मेरो भन्ने हुन्छ । जस्तोसुकै आदर्शको कुरा गरे पनि, जतिसुकै महान देखिन खोजे पनि यी म र मेरोमा अलिकति धक्का लाग्नेबित्तिकै, ढेस पुग्नेबित्तिकै त्यस्ता आदर्श र महानता कुन सड्को ‘फू&rsquo...
२०६२ सालपछिको कुरा हो, अख्तियार दुरूपयोग अनुसन्धान आयोगका एकजना उपसचिव र एकजना शाखा अधिकृत कम्पनी रजिष्ट्रारको कार्यालयमा सरुवा भएर गए । यति मात्र होइन, राष्ट्रिय सतर्कता केन्द्रका एक उपसचिव पनि सोही कार्यालयमा...
धेरै पहिलेको कुरा हो एक जना सज्जनका दुई भाइ छोरा थिए । उनीहरूबीच निकै मिल्ती थियो । एकपटक भगवान्ले आएर वरदान माग भनेकाले उनीहरूले अमरताको वर मागेका थिए । उनीहरूको कुरा सुनेर भगवान्ले भने– ‘...