निर्धारित समयमा कार्यान्वयन नहुँदा रद्द हुने अवस्थामा पुगेको विश्व बैंकको ४४ करोडको 'प्राजेक्ट' पुन प्रक्रियामा जाने भएको छ ।

डिजिटल नेपाल फ्रेमवर्कलाई अगाडि बढाउन विश्व बैंकले दिएको ४४ करोडको प्रोजेक्ट फेरि नयाँ प्रक्रियाबाट बढेको सञ्चार तथा सूचना प्रविधि मन्त्रालयले जनाएको छ ।

डिजिटल नेपाल फ्रेमवर्कलाई सहयोग गर्न भन्दै विश्व बैंकले सन् २०२२ जुन १६ बाट शुरू गर्ने गरी भएको सम्झौतामा ढिलो भएपछि उक्त योजना फिर्ता लैजाने तयारी गरेको थियो ।

तर पछिल्लो मन्त्रालयमा सचिव परिवर्तन भएसँगै त्यसलाई फेरि पुनर्विचार गरेर नयाँ ढङ्गले अगाडि लैजानका लागि अर्थ मन्त्रालयमा छलफलका लागि गएको सञ्चार मन्त्रालयका प्रवक्ता नेत्रप्रसाद सुवेदीले बताए ।

‘ढिलो हुने भएपछि विश्व बैंकले प्रोजेक्ट रद्द गर्न लागेको थियो । तर त्यसलाई फेरि नयाँ तरिकाबाट लैजाने गरी अर्थ मन्त्रालयमा छलफलका लागि पठाएका छौं', प्रवक्ता सुवेदीले लोकान्तरसँग भने, ‘त्यसका लागि विश्व बैंकले पहिला दिने रकममा केही कम हुने गरी प्रस्ताव ल्याउन भनेको छ ।’

यो योजना सन् २०२७ जुलाई १७ सम्मका लागि तय भएको थियो । तर यो जना मध्य अवधि हुन लाग्दा पनि अगाडि नबढेपछि विश्व बैंकले फिर्ता लैजाने तयारी गरेको थियो । प्रवक्ता सुवेदीका अनुसार अब विश्व बैंकले पहिला दिएको भन्दा कम रकम दिनेछ ।​

तत्कालीन सरकारले २०७६ सालमा डिजिटल प्रविधिको प्रयोगबाट सेवा प्रवाह, उत्पादक र उत्पादकत्व अभिवृद्धि गर्ने भन्दै डिजिटल फ्रेमवर्क ल्याएको थियो ।

त्यसका लागि डिजिटल नेपाल फ्रेमवर्कमा प्रमुख ८ क्षेत्र छनोट गरिएको छ ।