नेपाल वायुसेवा निगमले देशको पर्यटन प्रवर्द्धनमा  सशक्त उपस्थिती देखाउने र विदेशी पर्यटकहरुलाईसमेत सेवा दिने उद्देश्यका साथ दुईवटा न्यारोबडी जहाज वेट लीजमा लिने प्रक्रिया शुरू गरेको छ ।

सोमवार एक विज्ञप्ति जारी गर्दै निगमले पारदर्शी ढंगले जहाजहरू लीजमा लिन तालुक मन्त्रालयको सहमति लिई सार्वजनिक खरिद ऐन, नियम बमोजिम मंगलवार सार्वजनिक माध्यमबाट अन्तर्राष्ट्रिय बोलपत्र आह्वान गरेको हो ।

हाल निगमसँग भएको दुइवटा वाइडबडी जहाज जापान, सिड्नी र कोरिया उडानमा प्रयोग भएका छन् । बाँकीदुइवटा न्यारो बडी जहाजले उडान चापको माग धान्न नसक्ने भएकोले दिल्ली, दुबई, दोहा, मलेसिया लगाएतका सेक्टरमा उडान थप गर्ने र भैरहवाबाटसमेत विदेशी गन्तव्यमा उडान भर्ने निगमको योजना रहेको छ । 

नेपाल सरकारबाट विभिन्न समयमा गठित निगम सुधार आयोग, समितिहरुले समेत निगमको सम्भावित व्यापारलाई बिस्तार गर्न अहिले भएका जहाजले नपुग्ने सुझाएको निगमले जनाएको छ ।

'विभिन्न समिति, आयोगले तत्काल जहाज थप्नुपर्ने सुझाव दिएको सन्दर्भमा संस्कृति, पर्यटन तथा नागरिक उड्डयन मन्त्री सुदन किरातीको निर्देशन र निगमका कार्यकारी अध्यक्ष युवराज अधिकारीको पहलमा निगमको दश वर्षे व्यवसायिक योजना अनुरुप बजार बिस्तार गर्न जहाज थप्न लागिएको  हो,' प्रवक्ता रमेश पौडेलले हस्ताक्षर गरेको विज्ञप्तिमा उल्लेख छ ।

उक्त जहाजहरु आगामी जुलाई २०२४ सम्ममा निगमको उडानमा आइसक्ने अपेक्षा गरिएको छ ।