आईसीसी क्रिकेट विश्वकप लिग २ मा घरेलु टोली नेपाल नेदरल्यान्ड्सँग सहजै पराजित भएको छ ।

कीर्तिपुरस्थित त्रिवि मैदानमा आइतवार भएको खेलमा पाहुना टोली नेदरल्यान्ड्सले नेपालमाथि ८ विकेटको सहज जीत निकालेको हो ।

नेपालले दिएको १७२ रनको सामान्य लक्ष्य नेदरल्यान्ड्ले ३७.५ ओभरमा मात्र २ विकेटको क्षतिमा पूरा गर्यो ।

नेदरल्यान्ड्सलाई सहज जीत दिलाउन विक्रमजीत सिंहले अर्धशतकीय पारी खेल्दै सर्वाधिक ५८ रन बनाए । 

नेपालका लागि दीपेन्द्रसिंह ऐरी र ललितनारायण राजवंशीले १–१ विकेट लिए पनि त्यो टोलीको जीतका लागि पर्याप्त भएन ।

यता ब्याटिङतर्फ कुशत भुर्तेलबाहेक अरू खेलाडी चल्न नसक्दा नेपालले सामान्य १७२ रन मात्र बनाउन सकेको थियो ।

टस हारेर ब्याटिङमा उत्रिएको नेपालले पूरै ४९.३ ओभरमा १० विकेट गुमाउँदै १७२ रन जोडेको हो ।

यसक्रममा ओपनर भुर्तेलले ९३ बलमा ६६ रन बनाए ।

८ औं विकेटका लागि आरिफ शेख र करण केसीले टीमको थोरै रन उकासे । यस क्रममा आरिफले ५० बलमा २२ रन बनाए । करणले २७ बलमा २६ रन बनाए । 

अरू खेलाडीले उल्लेख्य रनको योगदान दिन सकेनन् । यसले गर्दा नेपालले नेदरल्यान्ड्सलाई मध्यम लक्ष्य पनि दिन सकेन । 

नेपालका लागि आसिफ शेखले १७, कप्तान रोहित पौडेलले १६, अनिल साह ७, गुल्सन झा ५ कुशल मल्ल २ रन बनाएर आउट भए । यस्तै भीम सार्की ८ बल खेल्दा खाता नै नखोली आउट भए । 

नेदरल्यान्ड्सका लागि आर्यन दत्ता र भिभियन किग्माले ३–३ विकेट लिए । 

यससँगै नेपालले लिग २ अन्तर्गत घरेलु मैदानमा भएका ४ खेलमध्ये ३ मा हार ब्यहोरेको छ ।  घरेलु मैदानमा नेपालको यो धेरै नै खराब नतिजा हो ।

आइतवार सकिएको श्रृंखलामा नेपालले नामिबियासँगका दुवै खेल गुमायो । क्रमशः ४ र २ विकेटले पराजित भएको हो । तर नेपालले दोस्रो खेलमा नेदरल्यान्ड्समाथि ९ विकेटको सानदार जीत निकालेको थियो ।   

यो श्रृंखलामा नेपालको ब्याटिङ लगभग फ्लप देखियो । बलिङ पनि धारिलो देखिएन ।

आइतवारको अन्तिम खेलमा नेदरल्यान्ड्सविरुद्ध पनि नेपाल ब्याटिङमै फ्लप देखियो । यस्तै बलिङले पनि खेलमा कमब्याक गराउन सकेन ।

लिग २ मा नेपालको ४ खेलबाट २ अंक छ। नामिबियाको ४ खेलबाट ६ र नेदरल्यान्ड्सको ४ खेलबाट ४ अंक रहेको छ ।