विश्वविजेता फ्रान्सका स्टार फूटबलर पाउल पोग्बामाथि लामो प्रतिबन्ध लागेको छ । ’एन्टी डोपिङ’ मुद्दामा दोषी ठहर भएपछि उनीमाथि चार वर्ष लामो प्रतिबन्ध लागेको हो । 

गत वर्ष लागुऔषध परीक्षणमा असफल भएपछि पोग्बालाई फूटबलबाट निलम्बन गरिएको थियो । अब उनले ४ वर्षसम्म खेल्न मात्र नभएर फूटबलसम्बन्धी कुनै गतिविधिमा सहभागी हुन पाउने छैनन् । उनलाई सन् २०२८ सम्म फूटबलबाट प्रतिबन्ध लगाइएको छ ।

३० वर्षीय पाेग्बाका लागि यो करियर सकिएजस्तै नै हो । किनकि, चार वर्षे प्रतिबन्ध पार गर्दा उनी ३४ वर्ष पुगिसक्ने छन् । एउटा फूटबलरका लागि यो उमेर पुनरागमनका लागि उपर्युक्त होइन ।

पोग्बालाई गत अगस्ट २० मा इटालियन क्लब युभेन्टसले उडिनेजीलाई ३–० ले हराएपछि शंका लागेर अनियमित परीक्षणका लागि छनोट गरिएको थियो । लागुऔषध परीक्षण गर्दा शुरूमा उनको प्रणालीमा ’टेस्टोस्टेरोन’को उच्च स्तर देखिएको थियो । यसकारण उनलाई निलम्बन मात्र गरिएको थियो ।

तर अहिले दोषी नै ठहर भएपछि उनलाई सजाय तोकिएको हो ।

पोग्बासहितको फ्रान्सले सन् २०१८ मा रुसमा भएको विश्वकपको उपाधि जितेको थियो । फाइनलमा क्रोएसियालाई ४–२ गोल अन्तरले हराउँदा पोग्बाले पनि एक गोल गरेका थिए ।

यसअघि मिडफिल्डर पोग्बाले इंग्लिस क्लब म्यानचेस्टर युनाइटेडबाट पनि खेलेका थिए ।