स्पेनिस ला लिगा फूटबलमा दुई गोलले पछि परेको अवस्था उल्टाउँदै रियल म्याड्रिडले खेल बराबरीमा ल्याएको छ ।

शनिवार राति भएको २७औँ साताको खेलमा शीर्ष स्थानको रियल हारबाट जोगिएको हो । 

यससँगै रियल र भ्यालेन्सियाबीचको खेल २–२ को बराबरीमा रोकिएको छ । खेलको ३०औं मिनेटभित्र दुई गोल खाएपछि पाहुना टोली रियल दबाबमा परेको थियो । त्यसपछि  रियललाई खेलमा फर्किन धेरै संघर्ष गर्नु पर्यो । 

आफ्नो घरमा भ्यालेन्सियाका लागि २७औं मिनेटमा ह्युगो डुरोले गोलको खाता खोलेका थिए । त्यसको तीन मिनेटमै रियलको डिफेन्सको कमजोरीमा रोमान यारेनचुकले सहजै गोल गरेपछि रियल दुई गोलले पछि पर्न गयो । तर त्यसपछि भिनिसियस जुनियरले रियलको उद्धार गरे । उनले पहिलो हाफको अतिरिक्त समयमा रोड्रिगोको पासमा गोल गरेर खेलमा फर्किने आधार तय गरेका थिए । त्यसपछि ७६ औं मिनेटमा उनैले व्यक्तिगत दोस्रो गोल गरेपछि खेल बराबरीमा आयो । 

खेलको अन्तिम समयमा रियलका लागि चोटबाट फर्किएका जुड बेलिङघमले विजयी गोल गरेको थिए । सो गोललाई रेफ्रीले मान्यता दिएनन् । यसै विषयमा रेफ्रीसँग विवाद गर्दा बेलिङघमले सिधै रातो कार्ड पाए । त्यसपछि खेल २–२ गोलको बराबरीमा सकियो ।

यो बराबरीपछि २७ खेल सकिँदा लिगको शीर्ष स्थानमा रहेको रियलको खातामा ६६ अंक भएको छ । एक खेल कम खेलेको दोस्रो स्थानको जिरोनाको ५९ अंक छ । यदि जिरोनाले बाँकी एक खेल जितेमा रियलसँगको दूरी ४ अंकमा सीमित पार्नेछ ।

तेस्रो स्थानको बार्सिलोनाको २६ खेलबाट ५७ अंक छ । भ्यालेसियाको भने २६ खेलमा ३७ अंक छ । उ लिगको नवौं स्थानमा छन् ।