नेपाल उद्योग वाणिज्य महासङ्घका अध्यक्ष चन्द्र ढकालले मुलुकको विकासका लागि साझा एजेन्डा बनाउनुपर्ने बताएका छन् ।

पर्वत उद्योग वाणिज्य सङ्घको ४१औं वार्षिक साधारण सभा तथा १८औं अधिवेशनको आज कुश्मामा उद्घाटन गर्दै उनले यस्तो बताएका हुन् । विकासका साझा एजेन्डा नभएसम्म मुलुकले आर्थिक समृद्धि हासिल गर्न नसक्ने उनको भनाइ छ ।

अध्यक्ष ढकालले आर्थिक हिसाबले मुलुक अस्तव्यस्त बनेको बेला सबै दलहरूले विकासका साझा एजेन्डा तयार गर्नुपर्नेमा जोड दिए ।

उनले उद्योग, कलकारखाना खोल्ने कुरालाई राज्यले पहिलो प्राथमिकतामा राख्नुपर्ने बताउँदै औद्योगिक क्षेत्रको विकाससँगै ऊर्जा, जलस्रोत, पर्यटन क्षेत्रको विकासमा जोड दिनुपर्ने बताए ।

कोभिड–१९, रसिया–युक्रेन युद्धका साथै सरकारको आर्थिक नीतिका कारण धरासायी बनेको अर्थतन्त्र अब सुधार हुँदै जाने अध्यक्ष ढकालको भनाइ थियो ।

'जति बिग्रिने हो त्यति बिग्रिसकेको छ । अब अर्थतन्त्र चलायमान हुँदै गएकाले यो क्षेत्र सुधार हुन्छ', उनले भने ।

अध्यक्ष ढकालले उद्योग वाणिज्य महासङ्घको निरन्तरको दबाबपछि राष्ट्र बैंकले ब्याजदर घटाएको स्मरण गराए । 

पर्वतको विकासको लागि लगानीमैत्री वातावरण बनाउने सङ्कल्प गर्नुपर्ने उनको भनाइ छ ।

अध्यक्ष ढकालले तीन तहका सरकारका बीच समन्वय नहुँदा लगानीकर्ता र व्यवसायीले उल्झन व्यहोर्नुपरेको बताए । 

उपयुक्त समय भएमा एक वर्षमै लगानीको क्षेत्रमा ठूलो उपलब्धि हासिल हुने उनले बताए ।